„დღეს კიდევ ერთხელ, სამწუხაროდ ოპოზიციამ და მობილურ ტელეფონებს, ეკრანს მიღმა ანგაჟირებულმა ადამიანებმა კიდევ ერთხელ გამოავლინეს თუ რამდენად სურთ სიძულვილის დათესვა ამ ტრაგედიის ფონზე. ყველანაირად ცდილობენ, რომ ყველა მიზეზი გამოიყენონ, ყველა სიტყვა გაატარონ ისეთ ფილტრში, რომელიც არ იყო იმ კონტექსტში ასე ნათქვამი, და გამოიწვიონ სიძულვილი და მათ შორის დაზარალებულებიც გამოიყენონ ამისთვის. სამწუხაროდ, ეს არის ნაწილი იმ ისტერიის და დეზინფორმაციისა, რომელსაც პირველივე წუთიდან, როდესაც მაშველები იყვნენ მობილიზებული და ცდილობდნენ დახმარებოდნენ სტიქიაში მოყოლილებს, ოპოზიცია და გარკვეული ჯგუფები დაკავებული იყო იმით, რომ საბოტაჟი გაეწიათ ამ ყველაფრისთვის.
უკვე მე-12 დღეა სტიქიიდან და ვხედავთ, რამდენად დიდია სურვილი ამ ჯგუფებში, რომ რამენაირად ეს ბუნებრივი სტიქია დაბრალდეს ხელისუფლებას. როგორ იმედით უყურებენ ნებისმიერ სატელიტურ სურათს, როგორ იმედით უყურებენ ნებისმიერ მონაყოლს და იქნებ რაღაცნაირად ნახონ ხელმოსაჭიდი, რომ ეს ტრაგედია დააბრალონ ხელისუფლებას. არ ვიცი, რა შინაგანი განწყობა უნდა ჰქონდეს ადამიანს, რომ ასეთი ბოროტული სურვილი გქონდეს, ამ ტრაგედიის ფონზე ეძებდე და გქონდეს სურვილი, რომ იქნებ კიდევ რაიმენაირად დაამძიმო და ამაში ადამიანური ფაქტორები ეძიო" [პირველი არხი]
აცხადებს პარლამენტის თავმჯდომარე შალვა პაპუაშვილი იმ კრიტიკის პასუხად, რაც კობახიძის განცხადებას მოჰყვა, რომელმაც შოვის სტიქიას გადარჩენილ ადამიანებს მატყუარები უწოდა.
