მე ვიცნობ ბორელს და მგონია, რომ ის თბილისში მიდის პასუხების მისაღებად კონკრეტულ შეკითხვებზე, რეალურად სურს თუ არა მთავრობას კანდიდატის სტატუსი - იოზვიაკი
გამოქვეყნდა:
საკუთარ კარში გატანილი კიდევ ერთი გოლი - ასე აფასებს ბრიუსელი საქართველოს ხელისუფლების შურისძიებას.
"რადიო თავისუფლების" ბრიუსელის ბიუროს რედაქტორი, რიკარდ იოზვიაკი "მთავარ არხთან" ინტერვიუში აცხადებს, რომ დასავლეთში ღიად საუბრობენ, რომ საქართველოს მთავრობა შესაძლოა შეგნებულად ცდილობდეს სტატუსზე უარის მიღებას.
მისი თქმით, საქართველოსთვის მნიშვნელოვან გადაწყვეტებამდე მნიშვნელოვანია რა გზავნილით ჩამოდის თბილისში ევროკავშირის უმაღლესი კომისარი ჯოზეფ ბორელი.
"მე ეს მოვისმინე ბრიუსელში, სადაც ამბობენ, რომ შესაძლოა საქართველოს მთავრობა შეგნებულად ამზადებს ნეგატიურ სცენარს, რათა აჩვენოს, რა ცუდი და არასანდოა ბრიუსელი. ცოტათი გამიკვირდა, როცა გავიაზრე, რომ მსგავსმა მოსაზრებამ აქ შემოაღწია, მაგრამ მაინც მგონია, რომ ბრიუსელი დადებითად არის განწყობილი და იმედს არ კარგავს, რომ საქართველოს მთავრობას ეს სტატუსი გულწრფელად სურს. თუმცა, ამავე დროს ვხედავ გარკვეულ ყოყმანს და დაბნეულობას იმასთან დაკავშირებით, თუ რა გზას ირჩევს საქართველო.
ჯოზეფ ბორელის ვიზიტში მოულოდნელი და გასაკვირი არაფერია, ასეთი ვიზიტები ნორმალურია, მაგრამ ამჯერად გასაკვირი ის არის, რომ ეს ვიზიტი წინასწარ არ გამოცხადებულა და როგორც ჩანს მოულოდნელად დაიგეგმა. ეს საფუძველს მაძლევს ვიფიქრო, რომ ბრიუსელში ძალიან გაუკვირდათ ის, რაც ხდება სალომე ზურაბიშვილთან დაკავშირებით. ისინი ყოყმანობდნენ, ჩასულიყვნენ თუ არა საქართველოში და ბოლოს, როგორც ჩანს, გადაწყვიტეს, რომ ჩასულიყვნენ. თავისთავად ეს ცუდი სიგნალია, როდესაც ევროკავშირის კანდიდატის სტატუსის მსურველ ქვეყანაში გამგზავრებაზე ბრიუსელი ყოყმანობს. მე ვიცნობ ბატონ ბორელს და მგონია, რომ ის თბილისში მიდის პასუხების მისაღებად კონკრეტულ შეკითხვებზე, თუ რას გეგმავს საქართველოს მთავრობა და რეალურად სურთ თუ არა, რომ ქვეყანამ კანდიდატის სტატუსი მიიღოს. ბრიუსელში ახლა გაფართოების შესახებ მოხსენების მომზადება სრულდება და აქ სჭირდებათ უფრო მეტი მკაფიოობა, თუ რა მიმართულებით მიდის საქართველო." ამბობს იოზვიაკი "მთავართან".
ქვეყნისთვის სტატუსის მინიჭებასთან დაკავშირებით ევროკავშირის გადაწყვეტილებამდე ცოტა ხნით ადრე თბილისში ევროკავშირის უმაღლესი წარმომადგენელი და ვიცე-პრეზიდენტი ჩამოდის. ჯოზეფ ბორელის ვიზიტი თბილისში 7-8 სექტემბერს შედგება.
