უკრაინის საზღვაო ძალების მიერ შექმნილი დროებითი საზღვაო დერეფნით, უკრაინის პორტები შვიდმა გემმა დატოვა

უკრაინის საზღვაო ძალების სპიკერის, დიმიტრი პლეტენჩუკის ინფორმაციით, უკრაინის საზღვაო ძალების მიერ შექმნილი დროებითი საზღვაო დერეფნის მოწყობის შემდეგ, უკრაინის პორტები შვიდმა გემმა დატოვა. მათი უმეტესობა უკრაინაში რუსეთის შეჭრის გამო იყო დაბლოკილი.

"განახლებული მონაცემებით, ახალი დერეფანი შვიდმა გემმა გადაცურა. ხუთი იყო აქ სრულმასშტაბიანი შემოჭრის დაწყებამდე. პროცესი გრძელდება, ჩვენ ყველაფერს ვაკეთებთ ჩვენი ტერიტორიული წყლების უსაფრთხოების უზრუნველსაყოფად", - განაცხადა მომხსენებელმა.

პლეტენჩუკის თქმით, უკრაინის წყლებში შავ ზღვაში საშიშროებას ახლა ძირითადად შაჰიდის დრონები, ავიაცია და სარაკეტო იარაღი წარმოადგენს. 

„ჩვენ ყველაფერს ვაკეთებთ იმ ტერიტორიის უსაფრთხოების უზრუნველსაყოფად, სანამ ეს გემები ჩვენს ტერიტორიულ წყლებშია. შემდეგ ისინი უკვე შედიან რუმინეთის, ბულგარეთისა და თურქეთის რესპუბლიკის ტერიტორიულ წყლებში, ბოსფორის სრუტემდე. ეს უკვე არის ნატოს ქვეყნების ტერიტორიული ზღვა, შესაბამისად, დარტყმა ამ ტერიტორიაზე არის დარტყმა ამ ქვეყნებზე“, - განაცხადა  პლეტენჩუკმა.

შეგახსენებთ, 2023 წლის ივლისში რუსეთმა მარცვლეულის შეთანხმებიდან გასვლის შესახებ განაცხადა და მარცვლეულის პორტებისა და ინფრასტრუქტურის დაბომბვა დაიწყო ოდესაში. 2023 წლის 10 აგვისტოს უკრაინამ გახსნა დროებითი დერეფნები სამოქალაქო სავაჭრო გემებისთვის. 

სამხედრო საფრთხე რუსეთის ფედერაციის მხრიდან ისევ რჩება. აღნიშნული მარშრუტები, ძირითადად ომის დაწყების შემდეგ, უკრაინის პორტებში მდგარი გემებისთვის გაკეთდა.