რამდენიმე დღის წინ აქ იყო, გაფრინდა და დღეს აღარ შემოუშვეს...ჩვენს ოფისებზე მიდის თვალთვალი | რატომ არ შემოუშვეს ბრიტანელი კონსულტანტი საქართველოში?
გამოქვეყნდა:
არ აკმაყოფილებს საქართველოს კანონმდებლობით განსაზღვრულ სხვა მოთხოვნებს - სწორედ ეს მიზეზია მითითებული დოკუმენტზე, რომლითაც ბრიტანეთის მოქალაქეს, ენმ-ის პოლიტიკურ კონსულტანტს ქვეყანაში შემოსვლაზე უარი უთხრეს და საქართველოდან გააბრუნეს.
აეროპორტში იმყოფებოდნენ “ერთიანი ნაციონალური მოძრაობის” თავმჯდომარე ლევან ხაბეიშვილი, პარტიის გენერალური მდივანი პეტრე ცისკარიშვილი, რეგიონული მდივანი გიორგი ბოტკოველი. ისინი პასუხს ითხოვდნენ, რა მიზეზით არ მისცეს საზღვრის კვეთის უფლება ბენ მალეტს, რომელიც საქართველოში რამდენიმე დღის წინ უკვე იმყოფებოდა:
"მაინტერესებს ბრიტანეთის მოქალაქე, ჩვენი კონსულტანტი, რომელიც ერთი კვირის წინ იყო საქართველოში, რატომ გააბრუნეთ უკან? ვერ ხვდებით, რომ დიპლომატიურ სკანდალში შეიძლება გაეხვეთ?
რამდენიმე ეთერში ვთქვი, რომ კონსულტანტებს ჩამოიყვანს “ნაციონალური მოძრაობა”, “სტრატეგია აღმაშენებელი” და ჩვენ ვთქვით, რომ ვემზადებით რუსი ოლიგარქის დასამარცხებლად, მათ შორის ერთ-ერთი იყო ბრიტანეთის მოქალაქე ბენ მალეტი, რომელიც საქართველოში იმყოფებოდა ერთი კვირის წინ და რომელიც უნდა დაგვეხმაროს რუსების დამარცხებაში, დღეს ადამიანს არ უშვებენ, არადა რამდენიმე დღის წინ აქ იყო, გაფრინდა და დღეს მოდიოდა, მაგრამ არ შემოუშვეს, რადგან ჩვენს ოფისებზე მიდის თვალთვალი, ნახეს რომ ეს ადამიანი ჩვენთან დადიოდა ოფისში, ნახეს რომ ჩვენთან მუშაობდა, რუსები რომ ჩვენ მოქალაქეს კლავენ ეგ ხომ არ აინტერესებს, სამაგიეროდ ეს აინტერესებთ, რომ ბრიტანეთის მოქალაქე , რომელიც კონსულტანტია “ნაციონალური მოძრაობის” და “სტრატეგია აღმაშენებლის”, არ შემოუშვეს ქვეყანაში. თვალთვალის შედეგად დაადგინეს და უმიზეზოდ უშვებენ უკან.
გავრილოვს ხომ ფიანდაზებით ხვდებიან, რუს გენერლებს ამათი მინისტრი მასპინძლობს, რომელიც ცალ-ცალი ფეხსაცმლით მოვიდა და ახლა მილიონერია, ოკუპანტებს ეგებებიან ა ბრიტანეთის მოქალაქე ჰყავთ დატყვევებული საზღვარზე და უმიზეზოდ აბრუნებენ უკან. ახლა არავინ არ არის, რომ პასუხი გამცეს, თუ რატომ ხდება ეს, მაგრამ “რუსულ ოცნებას” მინდა ვუთხრა, ბენი არ ჩამოვა? სხვა კონსულტანტი იქნება, ბრიტანეთის გარდა დაგვეხმარებიან სხვა ქვეყნის მოქალაქეებიც, გაგვიწევენ კონსულტაციას და სწორად ეშინიათ ბიძინა ივანიშვილს და ლილუაშვილს, რომელიც როგორ იშოვოს მილიონები იმაზე ფიქრობს ასეთ დავალებებს ასრულებს.” - განაცხადა ლევან ხაბეიშვილმა
