ჩვენ ვერ ვიზრუნებთ, ისინი რუსეთ-უკრაინის ომის სამხედრო ტყვეები არიან | კობახიძე ქართველ მებრძოლებზე

სამხედრო ტყვეების საკითხი არის უკრაინის საქმე - ამბობს „ქართული ოცნების“ თავმჯდომარე ირაკლი კობახიძე უკრაინაში მებრძოლი საქართველოს ორი მოქალაქის რუსების ტყვეობაში ყოფნასთან დაკავშირებით დასმული შეკითხვის პასუხად. კობახიძის თქმით, უკრაინულ მხარესთან ამ თემაზე ვერ ითანამშრომლებენ.

"სამხედრო ტყვეებზე ჩვენ ვერ ვიზრუნებთ, რადგან ისინი არიან რუსეთ-უკრაინის ომის სამხედრო ტყვეები, მაგრამ ჩვენი კონსტიტუციური ვალდებულებაა, ვიზრუნოთ მოქალაქეებზე. ამისთვის არსებობს შესაბამისი მექანიზმები. დანარჩენი არის მგრძნობიარე საკითხი, შესაბამისი უწყებების მიერ დასარეგულირებელი და რაიმე პასუხი თუ იქნება გასაცემი, შესაბამისი უწყებები გაგცემენ, თუნდაც მოკითხვასთან დაკავშირებით. ჩემი პრეროგატივა არ არის ამ კითხვებზე პასუხის გაცემა. ყველაფერთან დაკავშირებით პასუხს გაგცემენ შესაბამისი უწყებები...

ჩვენ უკრაინულ მხარესთან ამ თემაზე ვერ ვითანამშრომლებთ. ჩვენ შეგვიძლია, გამოვიყენოთ კონკრეტული არხები იმისთვის, რომ ვიზრუნოთ ჩვენი მოქალაქეების ინტერესების დაცვაზე. რაც შეეხება სამხედრო ტყვეების საკითხს, სამხედრო ტყვეების საკითხი არის უკრაინის საქმე გამომდინარე იქიდან, რომ ისინი არიან რუსეთ-უკრაინის ომის სამხედრო ტყვეები.“,  განაცხადა კობახიძემ.

შეგახსენებთ, რომ გიორგი ჩუბითიძე და გიორგი გოგლიძე ოკუპანტებმა გასულ კვირას დაატყვევეს. საქართველოს საგარეო საქმეთა სამინისტრომ განაცხადა, რომ მათი უფლებების დასაცავად მის ხელთ არსებულ ყველა მექანიზმს გამოიყენებს. 

ქართველი ტყვეების ოჯახები კი დახმარებას ითხოვენ.

იხილეთ:

• არ ვიცი რა მდგომარეობაშია, წითელ ჯვარს მივმართე... დამეხმარონ, თუ ვინმეს რამე შეუძლია | რუსების ტყვეობაში მყოფი ქართველი მებრძოლის დედა;
• "დამეხმარონ, რომ გადარჩეს ცოცხალი" | რუსების მიერ ტყვედ აყვანილი ქართველი მებრძოლის ოჯახი მთავრობას