"სამანქანო ხიდია, მაგრამ ვერც შეხვალ და ვერც ჩამოხვალ" - ხიდი არსაით

სამანქანო ხიდი, რომელზე ასვლაც ავტომობილით კი არა ფეხითაც შეუძლებელია, თეთრიწყაროს მუნიციპალიტეტში მდებარეობს. აქ მოხვედრა მხოლოდ სახელდახელოდ გაკეთებული ხის კიბეებითაა შესაძლებელი. წვერის დასახლებაში მაცხოვრებლები ამბობენ, რომ ხიდის აგების საჭიროება 13 ივნისის ტრაგიკული სტიქიის შემდეგ დადგა. იმის გამო, რომ საჭირო სახსრები სახელმწიფოსგან არ გამოიყო, ხიდის მოსაწყობად აუცილებელი მასალა მოსახლეობამ საკუთარი ხარჯით შეიძინა, თუმცა, უკვე 4 წელია, ხიდი უფუნქციოა და მასთან მისასვლელი გზა გაუმართავი.

ვისი პასუხისმგებლობაა, რომ ხიდი ამ დრომდე უმოქმედოა, "მთავარმა" ამის გარკვევა ადგილობრივ მუნიციპალიტეტში სცადა. სახელმწიფო უწყებებმა ერთმანეთთან გადაგვამისამართეს, თუმცა საბოლოოდ პასუხისმგებლობა ორივემ მოიხსნა. ორბეთის მერის წარმომადგენელი ამტკიცებს, რომ ხიდი რაიონის დადგმული არ არის და სახელმწიფომ გააკეთა. თეთრიწყაროს მერიაში კი გვითხრეს, რომ ხიდი  შეძლებულმა ადგილობრივებმა ააგეს.

წვერის დასახლებაში გადებული ხიდი რომ პირველი დაუსრულებელი ინფრასტრუქტურული პროექტი არ არის, ამაზე საუბრობენ ოპოზიციაში და პასუხისმგებელი პირების გამოკითხვას ითხოვენ.

ამ ურთიერთგამომრიცხავი განცხადებების შემდეგ გაურკვეველია, როგორ აღმოჩნდა საავტომობილო ხიდი წვერის დასახლებაში და ვის ეკისრება პასუხისმგებლობა.

ავტორი: ნინო ღვედაშვილი