ომბუდსმენი დეკანოზ მამალაძის გათავისუფლებას დადებითად აფასებს | ოქტომბერში მან ამ საქმეზე მინისტრს მიმართა

სახალხო დამცველი დადებითად აფასებს დეკანოზ გიორგი მამალაძის გათავისუფლების ფაქტს.

აპარატის ცნობით, დაახლოებით 3 თვის წინ, სახალხო დამცველმა თავად მიმართა იუსტიციის მინისტრს, გიორგი მამალაძის შინა პატიმრობაში გადაყვანისა ან ვადამდე გათავისუფლების საკითხის განხილვის რეკომენდაციით. 

განცხადებაში ნათქვამია, რომ სახალხო დამცველის ანგარიშებში მუდმივად იყო საუბარი გიორგი მამალაძის ჯანმრთელობის მძიმე მდგომარეობაზე და ყურადღება მახვილდებოდა იმაზე, რომ ის ვერ იღებდა სათანადო სამედიცინო მომსახურებას სრულყოფილად.

"სახალხო დამცველი დადებითად აფასებს გიორგი მამალაძის გათავისუფლების ფაქტს. დაახლოებით 3 თვის წინ, სახალხო დამცველმა იუსტიციის მინისტრს მსჯავრდებულ გიორგი მამალაძის თავისუფლების აღკვეთის უფრო მსუბუქი სასჯელით (შინაპატიმრობით) შეცვლის ან პირობით ვადამდე გათავისუფლების საკითხის განხილვის თაობაზე რეკომენდაციით მიმართა.  

სახალხო დამცველის აპარატის ინფორმაციით, პირობით ვადამდე გათავისუფლების საბჭომ 2024 წლის 14 თებერვალს დაასრულა საკითხის განხილვა და გიორგი მამალაძე გათავისუფლდა.

სახალხო დამცველის რეკომენდაციაში განსაკუთრებული ყურადღება დაეთმო გიორგი მამალაძის ჯანმრთელობის მდგომარეობას, ასევე პირობით ვადამდე გათავისუფლების სხვა კრიტერიუმებს. სახალხო დამცველი მოუწოდებდა საბჭოს სრულყოფილად შეესწავლათ გიორგი მამალაძის მდგომარეობა და ჯეროვანი ყურადღება გამახვილებულიყო რეკომენდაციაში მითითებულ ყველა ფაქტობრივ და სამართლებრივ გარემოებაზე.

საზოგადოებას შევახსენებთ, რომ 2019 წელს, სახალხო დამცველმა, მოწვეული სამედიცინო ექსპერტების დასკვნების საფუძველზე, რეკომენდაციით მიმართა იუსტიციის მინისტრს მსჯავრდებულ გიორგი მამალაძის ჯანმრთელობის დაცვის უზრუნველყოფის თაობაზე. შემდეგ პერიოდშიც გრძელდებოდა საქმის შესწავლა და სახალხო დამცველის 2020-2022 წლების ანგარიშებში მუდმივად იყო საუბარი გიორგი მამალაძის ჯანმრთელობის მძიმე მდგომარეობაზე და ყურადღება მახვილდებოდა იმაზე, რომ ის ვერ იღებდა სათანადო სამედიცინო მომსახურებას სრულყოფილად.

საბოლოოდ, 2023 წლის 30 ოქტომბერს, სახალხო დამცველმა რეკომენდაციით იუსტიციის მინისტრს მიმართა. სახალხო დამცველი მიესალმება მსჯავრდებულ გიორგი მამალაძის მიმართ საშეღავათო მექანიზმის გამოყენებას", - ვკითხულობთ აპარატის განცხადებაში. 

შეგახსენებთ, რომ გიორგი მამალაძე 7-წლიანი პატიმრობის შემდეგ გუშინ, 14 თებერვალს გაათავისუფლეს. მისი უფლებადამცველის ცნობით, დეკანოზი ე.წ. "უდოს" კომისიის გადაწყვეტილებით გათავისუფლდა.

პატიმრობის 7 წლის თავზე, 10 თებერვალს, "მთავარმა არხმა" მოიპოვა დოკუმენტი, რომლის მიხედვითაც საქმის ერთადერთი "დაზარალებული," შორენა თეთრუაშვილი, ბრალდებულს აღარ უჩიოდა და მზადყოფნა გამოთქვა, რომ დეკანოზის პატიმრობა პროკურატურამ შინაპატიმრობით შეეცვალა. დოკუმენტი 2022 წლის 17 ოქტომბრით თარიღდებოდა.