"ლაზარე უდანაშაულოა... ვფიქრობ, პრეზიდენტი, როგორც დედა, ისე შეხედავს ამ საკითხს... ვთხოვ, შეიწყალოს" | გრიგორიადისის დედა
გამოქვეყნდა:
"ლაზარე უდანაშაულოა... ვფიქრობ, პრეზიდენტი, როგორც დედა, ისე შეხედავს ამ საკითხს... ვთხოვ, შეიწყალოს" - ამის შესახებ მარტის აქციებზე დაკავებული პოლიტპატიმარი ლაზარე გრიგორიადისის დედამ თამთა კალანდაძემ "მთავარი არხის" ეთერში, გადაცემაში "ღამის მთავარი" ისაუბრა.
"ლაზარეს ველაპარაკე 3 მარტს, დამირეკა, დედის დღე მომილოცა. არის მხნედ. როცა ველაპარაკები არასდროს არ გამოთქვამს პრეტენზიას, არ გვაგრძნობინებს, რომ რამე უჭირს, ყოველთვის გვამხნევებს იქიდან. პრეზიდენტს ვეტყოდი, რომ ლაზარეს ვერ უმტკიცებენ იმას, რასაც აბრალებენ. ლაზარე არის აბსოლუტურად უდანაშაულო. ის იქ იდგა იმდენი ხალხის გვერდით, საჭირო დროს, საჭირო ადგილას და ვფიქრობ, რომ ქალბატონი პრეზიდენტი, როგორც დედა, ისე შეხედავს ამ საკითხს. ლაზარე არის სულ ახალგაზრდა, 21 წლის, რომელსაც წინ აქვს მომავალი. ჩვენი ხელისუფლება ცდილობს, რომ ახალგაზრდებს მომავალი წაართვას და საპყრობილეში გამოამწყვდიოს. და მე შევთხოვ მას, აუცილებლად გადახედოს ამ საკითხს და ლაზარე შეიწყალოს." - ამბობს ლაზარე გრიგორიადისის დედა.
შეგახსენებთ, რომ დღეს, 7 მარტს, რუსული კანონის პირველი მოსმენით მიღებიდან და მარტის აქციებიდან ერთი წელი გავიდა. ლაზარე გრიგორიადისი მარტის აქციების შემდეგ, 29 მარტს დააკავეს. ის დღემდე პოლიტიკურ პატიმრობაში რჩება. თბილისის საქალაქო სასამართლომ მარტის აქციებზე დაკავებულ ახალგაზრდას 31 მარტს აღკვეთის ღონისძიების სახით პატიმრობა შეუფარდა. ლაზარე გრიგორიადისის დასკვნითი სასამართლო პროცესი 28 მარტს გაიმართება.
იხილეთ ასევე:
