რეპრესიები წულუკიანის მეთოდებით | როგორ ეწირებიან პროფესიონალები კულტურის მინისტრის პოლიტიკას?
გამოქვეყნდა:
თეა წულუკიანს წლებია რეპრესიები გამოარჩევს. ეს კარგად მაშინ გამოჩნდა, როდესაც მან კულტურის, სპორტისა და ახალგაზრდობის მინისტრის პორტფელი ჩაიბარა. წულუკიანმა საკადრო რეპრესიების გამო ყველა მოიმდურა და გადაიმტერა, განსაკუთრებით კი კულტურის სფეროს მოღვაწეები. რასაც მის წინააღმდეგ არაერთი სასამართლო მოჰყვა და ამ დრომდე ყველა პროცესი გაშვებული საჯარო მოხელეების გამარჯვებით დასრულდა. რეპრესიულ პოლიტიკას ემატება თეა წულუკიანის დანიშნული ახალი კადრები, რომელსაც ძირითადად არაპროფესიული ნიშნით არჩევს. ასე მაგალითად თავის დროზე ეთნოგრაფიული და თბილისის ისტორიის მუზეუმის დირექტორად მსჯავრდებულთა ყოფილი მეთვალყურე დანიშნა. პრობაციის სააგენტოს ყოფილ ხელმძღვანელს კი ქართული კინო ჩააბარა.
