"გრაფიკი იყო მიუღებელი, სამსახური თავად დატოვა" | დეპარტამენტი მოსამართლე მადონა მაისურაძის განცხადებას სიცრუეს უწოდებს

საერთო სასამართლოების დეპარტამენტი მოსამართლე მადონა მაისურაძის განცხადებას განცხადებით პასუხობს და სიცრუეს უწოდებს. დეპარტამენტის ინფორმაციით, მაისურაძის მეუღლე, თავადაც ყოფილი მოსამართლე გიორგი ჩემია სამსახურიდან არ გაუთავისუფლებიათ და ჩემიასთვის "მიუღებელი" აღმოჩნდა სამსახურის გრაფიკი: 

„გავრცელდა მოსამართლე მადონა მაისურაძის ყოვლად უსაფუძვლო განცხადება, თითქოს მისი მეუღლე მისი პოზიციის გამო სამსახურიდან დაითხოვეს. ეს არის ცალსახად სიცრუე, ვინაიდან, მადონა მაისურაძის მეუღლე და ყოფილი მოსამართლე გიორგი ჩემია, რომელიც წლებია მუშაობს საერთო სასამართლოების დეპარტამენტში, ბოლო პერიოდში სისტემატურად არ ცხადდებოდა სამსახურში, ან ნახევარი სამუშაო დღის შემდეგ მიდიოდა სამსახურიდან. მას, სხვა თანამშრომლების მსგავსად, შეეთავაზა, რომ სამსახურში დროულად გამოცხადებულიყო და სრული სამუშაო დატვირთვით ემუშავა (კოლეგების თანასწორად), რაზეც მან განაცხადა უარი და თქვა, რომ მისთვის ეს გრაფიკი მიუღებელი იყო და ვერ შეძლებდა ინტენსიურ სიარულს, რის შემდეგაც სამსახურის დატოვების გადაწყვეტილება თავად მიიღო. შესაბამისად, სიცრუეა, რომ იგი ვინმემ აიძულა შეეწყვიტა სამსახურებრივი ხელშეკრულება და ეს არის მიზანმიმართული დისკრედიტაციის მცდელობა“, - ნათქვამია განცხადებაში.

შეგახსენებთ, რუსთავის საქალაქო სასამართლოს მოსამართლე მადონა მაისურაძე, რომელიც კეთილსინდისიერების შემოწმების მექანიზმს მხარს უჭერს,  აცხადებს, რომ მისი საჯარო პოზიციის გამო, მისი მეუღლე იძულებული გახდა სამსახურიდან წამოსულიყო.