"ვინმე მეთიუ მილერი", "რადიკალები", "საბჭოთა კავშირის დროინდელი მახინჯი პრაქტიკა" | კლანის წევრი მოსამართლის განცხადება "ოცნების" სტილში

თბილისის სააპელაციო სასამართლოს მოსამართლე, დიმიტრი გვრიტიშვილი აშშ-ის სახელმწიფო დეპარტამენტის პრესსპიკერს "ვინმე მეთიუ მილერად" მოიხსენიებს და "ოცნების" სტილში, სტრატეგიული პარტნიორის მოწოდებას, საბჭოთა კავშირის დროინდელ მახინჯ პრაქტიკას ადარებს. ასევე "ოცნების" სტილში, კლანის წევრი მოსამართლე "რადიკალებად" მოიხსენიებს ოპოზიციას და არასამთავრობოებს: 

აშშ-ის სახელმწიფო დეპარტამენტის სპიკერი, ვინმე მეთიუ მილერი ,,მოუწოდებს“ საქართველოს ხელისუფლებას, ,,კორუმპირებული აქტორების პასუხისგებაში მიცემის მიზნით ნაბიჯები გადადგას“. ,,აქტორებში“ იგულისხმებიან ჩემი კოლეგები, რომლებსაც, აბსოლუტურად უსაფუძვლოდ, ყოველგვარი ფაქტებისა და მტკიცებულებების მითითების გარეშე, შარშან, ხსენებულმა დეპარტამენტმა დაუწესა სანქციები.
ძველი თაობის ადამიანებს ემახსოვრებათ საბჭოთა კავშირის დროინდელი მახინჯი პრაქტიკა: მოსკოვიდან მოსული ბრძანება, თუნდაც ადამიანის დახვრეტის შესახებ, უაპელაციოდ რომ სრულდებოდა საქართველოში ადგილობრივი ჩინოვნიკების მიერ. 
როგორც ჩანს, არაფერი შეცვლილა: ზემოთ აღნიშნულ ,,მოწოდებაზე“, ხელების ფშვნეტით და ნიშნის მოგებით, ერთხმად აჭრიჭინდნენ ე.წ. არასამთავრობოები და რადიკალური პოლიტიკური ძალები, ერთმანეთს ასწრებენ, ვინ პირველი აღასრულებს ოკეანის გაღმიდან მოსულ, მოქმედი მოსამართლეების ,,დახვრეტის“ ბრძანებას, უაპელაციოდ, ფაქტების და ბრალდების დამტკიცების გარეშე. 
სხვა შემთხვევებში, მკვლელების და გამაუპატიურებლების მიმართ რომ უმაღლესი სტანდარტების დაცვას ითხოვენ ჩვენი ე.წ. უფლებადამცველი არასამთავრობოები, მოსამართლეთათვის პასუხისმგებლობის დაკისრებისათვის, მათი უფლებების ფეხქვეშ გათელვისათვის ახალი ბატონის მარტოოდენ სიტყვაც კი საკმარისია! ეს მაშინ, როცა აშშ-მ და მისმა საელჩომ, ასევე - იგივე ე.წ. არასამთავრობოებმა და რადიკალურმა პოლიტიკოსებმაც არად ჩააგდეს მოქმედი მოსამართლის - ლაშა ჩხიკვაძის მიერ ამერიკელი მაღალჩინოსნის მხილება, კონკრეტული სახელების და გვარების, ფაქტების გაჟღერებით; პირიქით - სიცრუის ტირაჟირება დაბრალდა მოსამართლეს. ეს ორმაგი სტანდარტიც აღარაა, უფრო აბსურდული სტანდარტია!
ანუ, მხოლოდ ბატონი შეიცვალა მავანთათვის საქართველოში;  მოსკოვიდან კი არა, ვაშინგტონიდან მოდის ახლა ბრძანებები. იგივე მონური, კოლონიალური დამოკიდებულება და ფსიქოლოგია." წერს გვრიტიშვილი.

 შეგახსენებთ, აშშ-ის სახელმწიფო დეპარტამენტი საქართველოს მთავრობას მოუწოდებს დაიწყოს გამოძიება კორუფციისთვის დასანქცირებულ მოსამართლეებზე:

„სანქციები დაწესდა, რათა ბოროტი აქტორებისთვის პასუხისმგებლობის დაკისრებას ხელი შეუწყოს, რომლებმაც დაუსჯელობით ისარგებლეს, ასევე, ქართულ საზოგადოებასა და სასამართლო სისტემაში კანონის უზენაესობის შელახვისთვის გაწეული სამუშაოსთვის. რაც შეეხება საქართველოს ხელისუფლებასთან კომუნიკაციას, რა თქმა უნდა, ხელისუფლებას მოვუწოდებთ, რომ კორუმპირებული აქტორების პასუხისგებაში მიცემის მიზნით ნაბიჯები გადადგას“, - ამბობს აშშ-ის სახელმწიფო დეპარტამენტის სპიკერი მეთიუ მილერი