"ეს არის საბჭოთა კავშირისკენ სწრაფვა. ადამიანებმა მოსკოვი ჩაინაცვლეს ბრიუსელით" | პაპუაშვილის პროპაგანდა რუსული კანონის მოწინააღმდეგეებზე

"ეს არის საბჭოთა კავშირისკენ სწრაფვა. ეს არის ის, რომ უბრალოდ ადამიანებმა მოსკოვი ჩაინაცვლეს თავის მენტალიტეტში ბრიუსელით", - ამის შესახებ პარლამენტის თავმჯდომარე შალვა პაპუაშვილი TV იმედის ეთერში საუბრობს და რუსული კანონის მოწინააღმდეგეებსა და აქციის მონაწილეებთან დაკავშირებით მორიგ პროპაგანდისტულ განცხადებას აკეთებს. 

"... ევროკავშირს სჭირდება ძლიერი სახელმწიფო. ჩვენ ხომ გვინდა ვიყოთ ევროკავშირის და არა საბჭოთა კავშირის წევრები?!

ის, რასაც დღეს გვეუბნება გარკვეული კასტა, სიმბიოზი NGO-ებისა და პარტიებისა, ეს არის სწრაფვა საბჭოთა კავშირისკენ. სხვა რამეა? რასაც გეტყვიან, ის რომ უნდა გააკეთო, ცალ ფეხზე დადგე, ოღონდ მიიღო დადებითი გადაწყვეტილება. ეს არის საბჭოთა კავშირისკენ სწრაფვა. ეს არის ის, რომ უბრალოდ ადამიანებმა მოსკოვი ჩაინაცვლეს თავის მენტალიტეტში ბრიუსელით, ან რაღაც სხვა დედაქალაქით. ეს არის სწორედ ყოფილი კოლონიის მენტალიტეტი, რომლითაც, როგორც ჩანს, ჯერ კიდევ დაავადებულია ჩვენი საზოგადოების გარკვეული ნაწილი და ვერ მოიცილა ეს მენტალიტეტი.

სწორედ ამას ვცდილობთ და ამას ვაკეთებთ ჩვენ და ჩვენი საზოგადოება. ის პატარა ჯგუფი ამ სიმბიოზური წარმონაქმნისა NGO-ების და პარტიების, პირიქით, მიგვექაჩებიან საბჭოთა კავშირისკენ და ცდილობენ, რომ გაგვხადონ ევროკავშირის ერთ-ერთი, როგორც ყოფილი საბჭოთა რესპუბლიკასავით. ასეთი წარმოდგენა აქვთ, არადა, არ არის ევროკავშირი ეს. ევროკავშირი არის თანაბარი სახელმწიფოების კავშირი და ჩვენ გვინდა არა მოწყალება ევროკავშირისგან, არამედ გადაწყვეტილებები, რომელსაც ჩვენ ერთობლივად მივიღებთ. ამიტომ, როგორც ჩანს, ჩვენ ჯერ კიდევ ვერ ვართ ბოლომდე გათავისუფლებულები ყოფილი კოლონიის კომპლექსებისგან, - ამბობს პაპუაშვილი.