საჯარო დაწესებულებებში სტაჟიორთა რაოდენობა იზრდება - ფრაქცია „ქართულ ოცნების“ ინიციატივა

ფრაქცია „ქართულ ოცნების“ ინიციატივით, პარლამენტს მალე წარედგინება პროექტი, რომლის მიღების შედეგად, საჯარო დაწესებულებებს მეტი სტაჟიორის აყვანის შესაძლებლობა ექნება - ინფორმაციას "რადიო თავისუფლება" ავრცელებს.

დღეს მოქმედი კანონით, სტაჟიორთა რიცხვი საჯარო დაწესებულების მთლიანი საშტატო რაოდენობის 10%-ზე მეტი არ უნდა იყოს. ცვლილებით კი ეს რიცხვი 20%-მდე გაიზრდება,

ანაზღაურებადი ხდება საჯარო დაწესებულებების სტაჟიორთა მივლინების ხარჯებიც.

შარშან, პარლამენტის მიერ განხორციელებული საკანონმდებლო ცვლილებებით, საჯარო დაწესებულებებში დასაქმებულ სტაჟიორთა საქმიანობა ანაზღაურებადი გახდა.

კანონპროექტის განმარტებით ბარათში წერია, რომ, მაგალითად, განათლების, მეცნიერებისა და ახალგაზრდობის სამინისტროს გადაწყვეტილებით, უახლოეს მომავალში მასშტაბური სტუდენტური ფესტივალი იწყება, რომელშიც დაახლოებით 20 000 სტუდენტი იქნება ჩართული. ასევე:
„გაძლიერდება საბანაკე მიმართულება, იქნება საგრანტო პროექტები, თემატური ბანაკები... ყველა ეს კომპონენტი არის მცდელობა იმისა, რომ ეს სერვისი რაც შეიძლება მეტ სტუდენტს მისწვდეს და რაც შეიძლება მეტი სტუდენტი იყოს ჩართული. ამ პოლიტიკის ფარგლებში, სტუდენტთა სტაჟირება უმნიშვნელოვანესი საკითხია“.

ცვლილებები პარლამენტის ბიუროს უახლოეს სხდომაზე წარედგინება.