რუსეთის თავდაცვის მინისტრის მოადგილე ქრთამის აღების ბრალდებით დააკავეს

გამოქვეყნდა:

რუსეთის თავდაცვის მინისტრის მოადგილე, ტიმურ ივანოვი ქრთამის აღების ბრალდებით დააკავეს. რუსული დამოუკიდებელი გამოცემა "მედუზას" ცნობით, მის წინააღმდეგ გამოძიება განსაკუთრებით დიდი ოდენობით ქრთამის აღების მუხლით მიმდინარეობს, საუბარია მინიმუმ ერთ მილიონ რუბლზე.

საგამოძიებო კომიტეტი საქმის დეტალებს არ აკონკრეტებს. როდის დააკავეს ივანოვი, ჯერჯერობით უცნობია. 23 აპრილის შუადღისას ის თავდაცვის სამინისტროს სხდომას დაესწრო, რომელსაც მინისტრი - სერგეი შოიგუ ხელმძღვანელობდა, წერს RBC.

კრემლის პრესსპიკერმა, დიმიტრი პესკოვმა ჟურნალისტებს განუცხადა, რომ პუტინი დაკავების შესახებ ინფორმირებულია.

"წინასწარ იყო ინფორმირებული თავდაცვის მინისტრი სერგეი შოიგუც", - განაცხადა პესკოვმა.

"მედუზას" ცნობით, ივანოვი შოიგუს გუნდის წევრია, თავდაცვის მინისტრის მოადგილის პოსტს იკავებდა 2016 წლიდან. როგორც თავდაცვის მინისტრის მოადგილე, ივანოვი ზედამხედველობდა სამინისტროს ობიექტების მშენებლობას, რეკონსტრუქციასა და რემონტს, სამხედრო იპოთეკებს, ასევე პასუხისმგებელი იყო რუსეთის შეიარაღებული ძალების საბინაო და სამედიცინო დახმარებაზე, ქონების მართვასა და ჯარების დაყოფაზე.

2019 წელს ივანოვი მოხვდა ჟურნალ Forbes-ის მიერ შედგენილ უსაფრთხოების უმდიდრეს ჩინოვნიკთა რეიტინგში. 2018 წლის შედეგების მიხედვით, გამოცემამ მისი ოჯახის შემოსავალი შეაფასა 136,7 მილიონი რუბლად, ხოლო ივანოვის შემოსავალი 13,6 მილიონ რუბლად.

მთავარი 18:00
უყურეთ ბოლო გამოშვებას

იხილეთ ჩვენს ეთერში

დღის მთავარი