"ენგურჰესის" ფუნქციონირებას საფრთხე არ ემუქრება - სტრატეგიული ობიექტი განცხადებას ავრცელებს
გამოქვეყნდა:
"ენგურჰესის" ფუნქციონირებას საფრთხე არ ემუქრება. ობიექტის პრესსამსახურის ინოფრმაციით, კოვიდინფიცირებული თანამშრომლები ონლაინ რეჟიმში მუშაობდნენ.
4 ინფიცირებული გალის რაიონის დასახლება საბერიოდან საქართველოს მიერ კონტროლირებად ტერიტორიაზე უკვე გადმოიყვანეს და ექიმების მეთვალყურეობის ქვეშ არიან.
გარდა ამისა, ოფიციალური ინფორმაციით, ენგურჰესის კიდევ 10 თანამშრომლის ტესტის პასუხი უარყოფითია:
გალის რაიონის დასახლება საბერიოში კორონავირუსით ინფიცირების რამდენიმე შემთხვევა დაფიქსირდა, მათ შორის არის შპს „ენგურჰესის“ 4 თანამშრომელი. ინფიცირებულები და მათთან კონტაქტში მყოფი პირები გადმოყვანილი არიან საქართველოს მიერ კონტროლირებად ტერიტორიაზე და ექიმების მეთვალყურეობის ქვეშ იმყოფებიან. ჩვენთვის უკვე ცნობილია, რომ 10 ადამიანის ტესტის პასუხი უარყოფითია.
უნდა აღინიშნოს, რომ ინფიცირებული თანამშრომლები ონლაინ რეჟიმში მუშაობდნენ და მათ „ენგურჰესის“ სხვა თანამშრომლებთან განსაკუთრებული შეხება არ ჰქონიათ. ამ ფაქტის მიუხედავად, „ენგურჰესის,“ როგორც სტრატეგიული ობიექტის ფუნქციონირებას არანაირი საფრთხე არ ემუქრება - ტექნიკური პერსონალი ცვლების მიხედვით არის განაწილებული და ობიექტი ჩვეულ რეჟიმში მუშაობას აგრძელებს.
2020 წლის 12 მარტიდან შპს „ენგურჰესი“ დისტანციურ რეჟიმში მუშაობს. ეპიდსიტუაციის შესაბამისად, მთელი ამ ხნის განმავლობაში პერსონალი საგანგებოდ შედგენილი განრიგით ხელმძღვანელობდა, რაც იმას ნიშნავს, რომ თანამშრომლები სამსახურში მხოლოდ გადაუდებელი აუცილებლობით გამოწვეულ შემთხვევაში ცხადდებოდნენ. მათ ყოველდღიურად უტარდებოდათ თერმოსკრინინგი, თითოეული მათგანი უზრუნველყოფილი იყო სამედიცინო ნიღბებითა და სადეზინფექციო ხსნარებით, შეზღუდული რაოდენობით მათი ადგილზე ყოფნა კი დისტანცირების საშუალებას იძლეოდა. თუმცა, როგორც მოგეხსენებათ, ახალი კორონავირუსის პანდემიის მსოფლიო მასშტაბებიდან გამომდინარე, ინფიცირების შემთხვევების აბსოლუტური პრევენციის გარანტია არ არსებობს და შესაბამისად, ამისგან დაზღვეული არავინ არის.
კიდევ ერთხელ ხაზგასმით აღვნიშნავთ, რომ „ენგურჰესის“ სრულყოფილ ფუნქციონირებას საფრთხე არ ემუქრება და საწარმო ჩვეულ რეჟიმში აგრძელებს მუშაობას - ნათქვამია ენგურჰესის განცხადებაში.
"ენგურჰესის" თანამშრომლების კოვიდინფიცირების შესახებ ინფორმაცია დღეს, 10 სექტემბერს, დაახლოებით 1 საათის წინ გავრცელდა.
