უვიზო რეჟიმის შეჩერებისთვის 27-დან მხოლოდ 15 ქვეყნის თანხმობაა საჭირო | გოგოლაშვილისა და გიგიაძის განმარტება
გამოქვეყნდა:
საფრთხე უვიზო მიმოსვლისთვის - ევროპარლამენტის მიერ გუშინ, 25 აპრილს მიღებულ რეზოლუციაში ვკითხულობთ, რომ ევროპარლამენტი ევროკომისიას მოუწოდებს, შეაფასოს "აგენტების კანონის" გავლენა საქართველოს მიერ ვიზალიბერალიზაციის კრიტერიუმების შესრულებაზე. განსაკუთრებით, ფუნდამენტური უფლებების ნაწილში, რაც ევროკავშირთან სავიზო ლიბერალიზაციის პოლიტიკის უმნიშვნელოვანესი კომპონენტია.
როგორც საგარეო საქმეთა მონისტრის ყოფილი მოადგილე და 2014-2016 წლებში საქართველო-ევროკავშირის სავიზო რეჟიმის ლიბერალიზაციის პროცესში მთავარი მომლაპარაკებელი ქართული მხრიდან, გიგი გიგიაძე განმარტავს, სავიზო რეჟიმის შეჩერების მექანიზმის ასამოქმედებლად 27-იდან მხოლოდ 15 ქვეყნის თანხმობაა საჭირო.
ევროპული კვლევების ცენტრის დირექტორი, კახა გოგოლაშვილი კი აღნიშნავს, რომ ხელისუფლების წარმომადგენლები არასწორ ინფორმაციას ავრცელებენ, როცა ამბობენ, რომ უვიზო რეჟიმის გაუქმებისთვის EU-ს წევრი ქვეყნების კონსენსუსია საჭირო.
"რაც შეეხება ევროკავშირის უვიზო რეჟიმის გაუქმების შესაძლებლობას. ხელისუფლების მაღალი თანამდებობის პირები არასწორ ინფორმაციას ავრცელებენ, თითქოსდა უვიზო რეჟიმის გაუქმებას ევროკავშირის წევრი ქვეყნების კონსენსუსი ესაჭიროება, ამიტომ ეს ტექნიკურად თითქმის შეუძლებელი ამოცანა არისო. სინამდვილეში საკმარისია ქვეყნების უბრალო უმრავლესობის მიმართვა, რომ ევროკომისიამ შეაჩეროს უვიზო მიმოსვლა მესამე ქვეყანასთან 9 თვით, ხოლო საკითხის შესწავლის შემდგომ (თუ დადასტურდა გაუქმებისთვის აუცილებელი პირობების არსებობა) კიდევ 18 თვით. ბოლო წლების განმავლობაში უვიზო მიმოსვლა შეუჩერეს ალბანეთს და ვანუატუს, იგივე მექანიზმის გამოყენებით გამარტივებული სავიზო რეჟიმი შეუჩერეს რუსეთს და ბელარუსს. ამ მექანიზმით უვიზო მიმოსვლის შეჩერების ფორმალური მიზეზები მოიცავს მიგრანტებისა და თავშესაფრის მაძიებელთა მოზღვავებას, უსაფრთხოების გამოწვევებს წევრი ქვეყნებისთვის, ქვეყნის მოქალაქეების მიერ ევროკავშირში ჩადენილი დანაშაულების ზრდა. საქართველოს ამ მომენტისთვის ეს მუხლები საკმარისად აქვს დარღვეული გერმანიის, ბელგიის თუ რამდენიმე სხვა ქვეყანასთან მიმართებაში. ამიტომ, პოლიტიკური ნების არსებობის შემთხვევაში ნებისმიერს ამ წევრი ქვეყნებიდან შეუძლიათ მოახდინონ პროცედურის ინიცირება. ჯერჯერობით ამას არ აკეთებენ მხოლოდ მათი კეთილი ნების გამო, რომელიც შესაძლოა გაქრეს, თუ მთავრობა გააგრძელებს ევროკავშირის დამუნათებას, დემოკრატიულ უკუსვლას და მისი მოთმინების გამოცდას. ასე მგონია, ოცნების ჩინოვნიკებმა ინგლისური არ იციან, ან ჰგონიათ, რომ მათ გარდა სხვამ არავინ იცის საქართველოში. უვიზო მიმოსვლის შეჩერების მექანიზმის შესაბამისი რეგულაციის ბმულს აქვე ვდებ, რომ ნახოთ და თავად დარწმუნდეთ ვინ ტყუის და ვინ არა," - წერს გოგოლაშვილი.
ასევე ნახეთ:
