"საქართველოს მთავრობამ ცრუ ნარატივებისგან თავი უნდა შეიკავოს" | შვედეთის საგარეო საქმეთა მინისტრი

რუსულ კანონს და თბილისში მიმდინარე საპროტესტო აქციებს შვედეთის საგარეო საქმეთა მინისტრი, ტობიას ბილსტრემი ეხმაურება. ამბობს, რომ საქართველოს მთავრობამ ცრუ ნარატივებისგან თავი უნდა შეიკავოს.

ბილსტრემი ამბობს, რომ წარდგენილი კანონპროექტი მოქალაქეთა დიდი უმრავლესობის მიერ მხარდაჭერილი საქართველოს განცხადებული ევროკავშირის ამბიციებისა და კანდიდატი ქვეყნის მონდომების წინააღმდეგ წავა.

"ბოლო კვირების განმავლობაში ათიათასობით ქართველი მთელ ქვეყანაში ქუჩაში გამოვიდა, რათა ხმა აემაღლებინათ ე.წ. უცხოური გავლენის კანონპროექტის შესახებ. შვედეთი ამ მოვლენებს ყურადღებით აკვირდება და გმობს ძალადობას მშვიდობიანი დემონსტრანტების წინააღმდეგ. გამოხატვისა და თავშეყრის თავისუფლებას პატივი უნდა ეცეს. საქართველოსთვის კანდიდატის სტატუსის მინიჭებით ევროკავშირმა აჩვენა თავისი მხარდაჭერა ქართველი ხალხის ევროპული მისწრაფებების მიმართ. ცოცხალი და დამოუკიდებელი სამოქალაქო საზოგადოება უდიდეს როლს ასრულებს საქართველოს ევროკავშირის გზაზე დაწინაურებაში.

წარდგენილი კანონპროექტი მოქალაქეთა დიდი უმრავლესობის მიერ მხარდაჭერილი საქართველოს განცხადებული ევროკავშირის ამბიციებისა და კანდიდატი ქვეყნის მონდომების წინააღმდეგ წავა. თუ ის იქნება მიღებული, ის საფრთხეს შეუქმნის საქართველოს წინსვლას ევროკავშირისკენ. საქართველოს მთავრობამ თავი უნდა შეიკავოს ცრუ ნარატივებისგან და გამამწვავებელი რიტორიკისგან. კანდიდატის სტატუსი საქართველოსთვის ისტორიული შესაძლებლობაა" - აცხადებს ტობიას ბილსტრემი