"სავსეა "ოცნება" რუსეთის აგენტებით... ხელისუფლებიდან წასვლის შიშის ერთ-ერთი მიზეზი ისიცაა, რომ მთელი ეს აგენტურა ამოვა ზედაპირზე" | ნიკა გვარამია "რადიო თავისუფლების" ინფორმაციაზე
გამოქვეყნდა:
პარტია "ახალის" თანათავმჯდომარე, ნიკა გვარამია ამბობს, რომ ერთ-ერთი მიზეზი, რის გამოც "ქართულ ოცნებას" ხელისუფლებიდან წასვლის შიში აქვს ისაა, რომ "აგენტურა ამოვა ზედაპირზე". ჟურნალისტებმა მას ჰკითხეს "რადიო თავისუფლების" მიერ გავრცელებულ ინფორმაციაზე, რომელსაც წყარო ეუბნება, რომ ამერიკის შეერთებული შტატები ფლობს ინფორმაციას, რომელსაც "ქართული პოლიტიკური ელიტის წარმომადგენლების რეპუტაციის გაცამტვერება შეუძლია".
"რუსეთის აგენტის განცხადება იყო ივანიშვილის გამოსვლა იმ მიტინგზე, ამას ბევრი მკითხაობა რად უნდა. შეგახსენებთ, აშშ-ს გამოვლენილი ჰყავს რუსეთის აგენტი საქართველოში და დასანქცირებული, ეს არის ფარცხალაძე. დანარჩენი, დროის და ტექნიკის საკითხია, ახლა ამას ბევრი ლაპარაკი რად უნდა. ამ ხელისუფლებას ხელისუფლებიდან წასვლის შიში რომ აქვს, ერთ-ერთი მიზეზი ისიც არის, რომ მთელი ეს აგენტურა ამოვა ზედაპირზე და ახალი ხელისუფლება რა თქმა უნდა ქვეყანას ვალდებულია უთხრას ვინ იყო რუსეთის აგენტი და ვინ მუშაობდა ქვეყნის საწინააღმდეგოდ რუსული ინტერესების გამო. რა გამოსააშკარავებელია, სავსეა ქართული ოცნება და ხელისუფლება, რუსეთის აგენტებით, თუ იქნება კონკრეტული სახელები და გვარები, რაზეც ჩვენც გვაქვს ინფორმაციაც და ეჭვიც და ქართული მედია დიდი ხანია ამაზე მუშაობს, თქვენდა სასახელოდ უნდა ითქვას, და კონკრეტული მტკიცებულებები, რა თქმა უნდა, ეს გასაგები იქნება, თუმცა ახლა რომელიმე რუსეთის აგენტს, რომელიც ღიად რუსულ საქმეს აკეთებს, გული გაუსკდება ამის გამო, ეს არ მგონია, მაგრამ მხილება ყოველთვის მნიშვნელოვანია", - თქვა ნიკა გვარამიამ.
