კობახიძემ ბლინკენის მოადგილეს "ორმხრივი ურთიერთობების გაჯანსაღებისთვის" მზადყოფნა დაუდასტურა | მთავრობა
გამოქვეყნდა:
პრემიერი კობახიძე აშშ-ის სახელმწიფო მდივნის მეორე მოადგილეს, ეზრა ზეიას შეხვდა. ინფორმაციას საქართველოს მთავრობა ავრცელებს. შეხვედრას ესწრებოდა აშშ-ის ელჩი, რობინ დანიგანიც:
"შეხვედრისას საუბარი შეეხო აშშ-საქართველოს სტრატეგიულ პარტნიორობას და მრავალი წლის განმავლობაში სხვადასხვა სფეროში წარმატებულ თანამშრომლობას, ასევე ბოლო პერიოდში არსებულ გამოწვევებს.
პრემიერ-მინისტრმა დაადასტურა საქართველოს ხელისუფლების მზადყოფნა ორმხრივი ურთიერთობების გაჯანსაღებისთვის და აღნიშნა, რომ ამ პროცესში შემხვედრ ნაბიჯებს და პრაგმატულ, რაციონალურ, სამართლიან მიდგომებს განსაკუთრებული მნიშვნელობა ენიჭება.
შეხვედრის ერთ-ერთი განსახილველი საკითხი იყო მომავალი საპარლამენტო არჩევნები და ქვეყანაში არსებული წინასაარჩევნო გარემო. პრემიერმა ხაზგასმით განაცხადა, რომ ამჯერადაც უზრუნველყოფილი იქნება თავისუფალი, სამართლიანი, გამჭვირვალე არჩევნების ჩატარება და პლურალისტური, საერთაშორისო სტანდარტების შესაბამისი საარჩევნო გარემო." ნათქვამია ინფორმაციაში.
ზეიასთან შეხვედრის შესახებ კობახიძემ X-ზეც დაწერა:
„ხაზი გავუსვით ჩვენი ორმხრივი პარტნიორობის განახლების და გაუმჯობესების აუცილებლობას, რათა ჩვენი სტრატეგიული პარტნიორობით სარგებელი მივიღოთ. ვისაუბრეთ წინასაარჩევნო გარემოზე და ადამიანის უფლებების დაცვის მნიშვნელობაზე თავისუფალი, უსაფრთხო და გამჭვირვალე არჩევნების უზრუნველსაყოფად“, - აღნიშნავს ირაკლი კობახიძე.
