ფინანსური და სავიზო სანქციები "ოცნებას" | აშშ-ის საელჩო ბლინკენის განცხადებას ავრცელებს

აშშ-ის საელჩო საქართველოში, სახელმწიფო მდივნის, ენტონი ბლინკენის გუშინდელი განცხადების სრულ თარგმანს ავრცელებს. საუბარია სახაზინო დეპარტამენტის მიერ, საქართველოს 4 მოქალაქის დასანქცირებაზე, ასევე სავიზო შეზღუდვებზე:

"შეერთებული შტატები დღეს აწესებს ანგარიშვალდებულების დაცვის ზომების ფართო სპექტრს საქართველოს ხელისუფლების წარმომადგენლებისა და სხვა პირების მიმართ, რომლებმაც ხელყვეს საქართველოს დემოკრატია და ქართველი ხალხის ადამიანის უფლებები.

ამერიკის შეერთებულმა შტატებმა საქართველოს ხელისუფლების ორ ოფიციალურ პირს – შინაგან საქმეთა სამინისტროს განსაკუთრებულ დავალებათა დეპარტამენტის უფროსს, ზვიად „ხარება“ ხარაზიშვილს და მის ერთ-ერთ მოადგილეს, მილერი ლაგაზაურს, სანქციები დაუწესა – „უცხოური გავლენის შესახებ კანონის“ წინააღმდეგ მშვიდობიანი საპროტესტო გამოსვლების დროს ძალადობრივი რეაგირებისას ადამიანის უფლებების სერიოზულ დარღვევაში მონაწილეობისთვის.

ასევე, ჩვენ სანქციებს ვუწესებთ ექსტრემისტული დაჯგუფების ორ ქართველ ლიდერს, კონსტანტინე მორგოშიასა და ზურაბ მახარაძეს, ადამიანის უფლებების სერიოზული დარღვევისთვის, მათ შორის ძალადობრივი თავდასხმისთვის იმ ქართველებზე, ვინც მშვიდობიანი შეკრების უფლებით სარგებლობდნენ.

სახელმწიფო დეპარტამენტი ასევე დამატებით ზომებს იღებს სავიზო შეზღუდვების დაწესებით მიზნით 60-ზე მეტ ქართველსა და მათი ოჯახის წევრებზე, რომლებიც პასუხისმგებელნი არიან ან თანამონაწილეები არიან საქართველოში დემოკრატიის ძირის გამოთხრაში. ესენი არიან სამთავრობო და მუნიციპალური ოფიციალური პირები, რომლებმაც ქართველი ხალხის ფუნდამენტური თავისუფლებების შეზღუდვის მიზნით უფლებამოსილება ბოროტად გამოიყენეს; ბიზნესმენები, რომლებიც კორუფციაში იყვნენ ჩართული; პირები, რომლებიც ავრცელებდნენ დეზინფორმაციას და ხელს უწყობდნენ ძალადობრივ ექსტრემიზმს; სამართალდამცავები, რომლებიც მონაწილეობდნენ დემონსტრანტების ცემაში; და პარლამენტის წევრები, რომლებმაც გადამწყვეტი როლი ითამაშეს არადემოკრატიული კანონმდებლობის ხელშეწყობასა და სამოქალაქო საზოგადოების შეზღუდვაში.

ჩვენ კვლავ შეშფოთებულები ვართ საქართველოში ადამიანის უფლებების დარღვევებითა და ანტიდემოკრატიული ქმედებებით და განვაგრძობთ საპასუხოდ დამატებითი ქმედებების განხილვას. შეერთებული შტატები ცალსახად უჭერს მხარს ქართველების უფლებებს შეიკრიბონ, ისაუბრონ და მშვიდობიანად გააპროტესტონ ძალადობის, დაშინების, ან ჩახშობის შიშის გარეშე.

სახაზინო დეპარტამენტის სანქცირების ზომები დღეს განხორციელდა აღმასრულებელი ბრძანების ნომერი 13818-ის შესაბამისად, რომელიც ეფუძნება და ახორციელებს "გლობალური მაგნიტსკის ადამიანის უფლებათა ანგარიშვალდებულების აქტს" და ეხება ადამიანის უფლებების სერიოზულ დარღვევასა და კორუფციაში ჩართულ დამნაშავეებს მთელ მსოფლიოში. მეტი ინფორმაციისთვის იხილეთ ხაზინის პრესრელიზი. დამატებითი ქმედებები ეფუძნება "იმიგრაციისა და მოქალაქეობის აქტის" 212(a)(3)(C) პუნქტის მიხედვით სავიზო შეზღუდვის პოლიტიკას, რომელიც სახელმწიფო მდივანმა ბლინკენმა 2024 წლის მაისში გამოაცხადა." ნათქვამია განცხადებაში. 

საქართველოში ფუნდამენტური თავისუფლებების, მათ შორის, გამოხატვის თავისუფლების შეზღუდვისთვის აშშ-ის სახაზინო დეპარტამენტმა 16 სექტემბერს ფინანსური სანქციები დაუწესა გდდ-ის ხელმძღვანელს ზვიად ხარაზიშვილს, იგივე "ხარებას " და მის მოადგილეს, მილერი ლაგაზაურს.

ფინანსური სანქციები დაუწესდათ პრორუსული დაჯგუფება ალტ ინფოს დამფუძნებლებსაც - კონსტანტინე მორგოშიასა და ზურა მახარაძეს.

გარდა ამისა, აშშ სავიზო შეზღუდვებს უწესებს 60-ზე მეტ პირს, მათ შორის "ოცნების" ხელისუფლების წარმომადგენლებს და მათი ოჯახის წევრებს.