ოკუპირებული აფხაზეთის "პარლამენტში" ჟურნალისტებს არ უშვებენ | ე.წ. დეპუტატები რუსეთთან ერთ-ერთი "შეთანხმების რატიფიცირებას" განიხილავენ

ოკუპირებული აფხაზეთის ე.წ. პარლამენტის სხდომაზე დამოუკიდებელ მედიის წარმომადგენლებს არ უშვებენ, მიუხედავად იმისა, რომ ჟურნალისტებს "აკრედიტაციები" აქვთ. 

სააგენტო „აიაშარას“ მთავარი რედაქტორის, ნიზფა არშბას ინფორმაციით, გადაწყვეტილება  "სახელმწიფო უსაფრთხოების სამსახურმა" მიიღო:

„პარლამენტის პრესსამსახური ხელებს შლის, თითქოს ვერაფერს წყვეტენ. დეპუტატებიც ჩუმად არიან და ამბობენ, რომ ვერაფერს აკეთებენ. არის პრეზიდენტის ადმინისტრაციისა და სახელმწიფო უსაფრთხოების სამსახურის ინსტრუქცია, რომელიც კრძალავს პარლამენტის სხდომებზე შესვლას“, - წერს ის.

„როდესაც პრეზიდენტის კრიმინალური ინიციატივები პარლამენტში გადის, ჟურნალისტებს სხდომაზე დასწრების უფლება არ აქვთ“, - იუწყება „ნუჟნაია გაზეტა“.

"თქვენს თვალწინ ხდება დანაშაული, დაცვის თანამშრომლები ერევიან ჟურნალისტების პროფესიულ საქმიანობაში!" – დასძენს “აფხაზური პორტალი”.

ცნობისთვის, ე.წ. დეპუტატები დღეს „ეკონომიკურ საკითხებში სასამართლო და საარბიტრაჟო გადაწყვეტილებების აღიარებისა და აღსრულების შესახებ“
რუსულ-აფხაზური "შეთანხმების რატიფიცირების" საკითხს განიხილავენ.

სწორედ ამ "შეთანხმების" დამტკიცების მოთხოვნა იყო ერთ-ერთი მიზეზი, რის გამოც 1-ელ  სექტემბერს მოსკოვმა აფხაზეთს დაფინანსება შეუჩერა.