ძლიერი წვიმა და წყალდიდობა ესპანეთში | არიან დაღუპულები, დაკარგულები და ქვეყნის ნაწილში გამოცხადებულია მაღალი დონის განგაში

აღმოსავლეთ და სამხრეთ ესპანეთში, 28 ოქტომბერს, ძლიერმა წვიმამ წყალდიდობა გამოიწვია, შედეგად სულ მცირე 51 ადამიანი დაიღუპა. ამის შესახებ ინფორმაციას რეგიონული მთავრობა ავრცელებს.

"ჩვენ ვდგავართ უპრეცედენტო ვითარების წინაშე, რომელიც არავის ახსოვს," - განაცხადა რეგიონული მთავრობის მეთაურმა კარლოს მაზონმა.

ოფიციალური პირების განცხადებით სულ მცირე 7 ადამიანი უგზო-უკვლოდ დაკარგულად ითვლება. სატვირთოს მძღოლი ვალენსიის რეგიონში და ექვსი ადამიანი ქალაქ ლეტურში, აღმოსავლეთ პროვინცია ალბასეტში. ესპანეთის საზოგადოებრივ ტელევიზია TVE-სთან ცენტრალური მთავრობის წარმომადგენელმა კასტილა-ლა მანჩაში, მილაგრას ტოლონმა განაცხადა, რომ დაკარგულების მოსაძებნად სასწრაფო დახმარების ჯგუფები მთელი ღამის განმავლობაში მუშაობენ - "პრიორიტეტი ამ ადამიანების პოვნაა," - თქვა ტოლონმა.

მომხდართან დაკავშირებით, ესპანეთის ცენტრალურმა მთავრობამ კრიზისული კომიტეტი შექმნა.

"ყურადღებით ვაკვირდები უგზო-უკვლოდ დაკარგულთა შესახებ ცნობებს და ბოლო საათებში ქარიშხლის შედეგად მიყენებულ ზარალს," - წერს პრემიერმინისტრი პედრო სანჩესი X-ზე.

ვალენსიის მერიამ სკოლებში სწავლება შეაჩერა. ძლიერი წვიმის შედეგად შეფერხდა სარკინიგზო და საჰაერო მიმოსვლაც. ვალენსიის აეროპორტის 12 რეისი ესპანეთის სხვა ქალაქებში გადამისამართდა, 10 კი გაუქმდა. სარკინიგზო ინფრასტრუქტურის ეროვნულმა ოპერატორმა ADIF-მა განაცხადა, რომ მან შეაჩერა ყველა სარკინიგზო მიმოსვლა ვალენსიის რეგიონში. რეგიონული მთავრობის განცხადებით, ანდალუსიის სამხრეთ რეგიონში ჩქაროსნული მატარებელი 276 მგზავრით რელსებიდან გადავიდა, თუმცა არავინ დაშავებულა.

სახელმწიფო მეტეოროლოგიურმა სააგენტო AEMET-მა ვალენსიის რეგიონში წითელი განგაში, ანდალუსიის ნაწილებში კი მეორე ყველაზე მაღალი დონის განგაში გამოაცხადა. მეტეოროლოგების თქმით, წვიმები სავარაუდოდ ხუთშაბათამდე გაგრძელდება.