დაბა ლაითურში კორონავირუსის შემთხვევების მატების გამო გადაადგილება შეიზღუდა
გამოქვეყნდა:
კორონავისუსით დაინფიცირების შემთხვევების მატების გამო დაბა ლაითურში გადაადგილება შეიზღუდა, ამის შესახებ ინფორმაციას ოზურგეთის მერია საკუთარ Facebook-ის გვერდზე აქვეყნებს.
მერიის განცხადებაში ასევე წერია, რომ სპეციალურად დაბა ლაითურის მოსახლეობისთვის გურიის სამხარეო ადმინისტრაციაში ცხელი ხაზი ამოქმედდა.
"ლაითურში მოსახლეობის შესვლა-გამოსვლა გაკონტროლდება სამართალდამცავთა მიერ. დაიწყება მოსახლეობის სიცხის გაზმოვა. მოვუწოდებთ მათ, გაგებით მოეკიდონ აღნიშნულ გადაწყვეტილებას, რათა თავიდან იქნეს აცილებული კორონავირუსის გავრცელება" - ამბობენ ოზურგეთის მერიაში.
ოზურგეთის მუნიციპალიტეტის მერიის პრესსამსახურის ცნობით, დღის განმავლობაში, დაბა ლაითურში 11 ახალი შემთხვევა დაფიქსირდა, ოზურგეთში 61, ხოლო გურიაში ინფიცირებულთა რაოდენობა 84- ია.
შეზღუდვები წესდება სხვა რეგიონშიც: 26 სექტემბრიდან აჭარაში საქალაქთაშორისო ტრანსპორტით გადაადგილება იკრძალება.
აღსანიშნავია, რომ ბოლო 24 საათში, საქართველოში კორონავირუსით ინფიცირების 259 ახალი შემთხვევა დადასტურდა, გამოჯანმრთელდა 62 ადამიანი, გარდაიცვალა - 1.
ბოლო მონაცემებით საქართველოში:
- კორონავირუსით ინფიცირებულია - 4399
- გამოჯანმრთელებულია - 1705
- მათ შორის გარდაცვლილია - 25
- კარანტინის რეჟიმში რჩება - 5390
- კოვიდ სასტუმროში მყოფი პირები - 640
- სტაციონარში მეთვალყურეობის ქვეშ - 836, მათ შორის საქართველოში სამკურნალოდ გადმოყვანილია - 41 პაციენტი.
შეგახსენებთ, რომ კორონავირუსის პირველი დადასტურებული შემთხვევა საქართველოში 26 თებერვალს გამოვლინდა.
