Bloomberg ბრიტანეთის მთავრობის წყაროებზე დაყრდნობით წერს, რომ რამდენიმე კვირის წინ, დიდმა ბრიტანეთმა უკრაინას რამდენიმე ათეული ფრთოსანი რაკეტა Storm Shadow გადასცა.
ეს არის კირ სტარმერის კაბინეტის მიერ მიღებული პირველი გადაწყვეტილება ასეთი რაკეტების მიწოდების შესახებ. ისინი უკრაინაში გაგზავნეს მანამ, სანამ კიევი მიიღებდა ლონდონის ნებართვას ამ იარაღის გამოყენებაზე რუსეთში სამიზნეების დასარტყმელად.
ბრიტანელმა ოფიციალურმა პირებმა უარი თქვეს ამ ინფორმაციის კომენტირებაზე, მაგრამ, Bloomberg-ის ცნობით, უკრაინის არმიამ პირველად გასულ კვირას დაიწყო Storm Shadow-ის სარაკეტო თავდასხმები რუსეთის ტერიტორიაზე. იქამდე კი უკრაინა მათ ანექსირებული ყირიმის ობიექტებზე დასარტყმელად იყენებდა.
ბრაზილიაში G20 სამიტის დროს სტარმერმა განაცხადა, რომ მისი მთავრობა აპირებს გაზარდოს დახმარება უკრაინისთვის.
