განსაკუთრებით შემაშფოთებელია წიწაკის სპრეის მიზანმიმართული გამოყენებისა და წყლის და ქიმიური გამღიზიანებლების კომბინაციის შესახებ ცნობები | გაეროს მომხსენებელი
გამოქვეყნდა:
საქართველოში განვითარებულ მოვლენებს გაეროს სპეციალური მომხსენებელი მშვიდობიანი შეკრებისა და გაერთიანების თავისუფლების საკითხებში ჯინა რომერო ეხმაურება და საპროტესტო აქციების ძალადობრივად დაშლასთან დაკავშირებით შეშფოთებას გამოთქვამს. ჯინა რომერო ყურადღებას ამახვილებს პროტესტის უფლების დაცვის საერთაშორისო სტანდარტებზე და თბილისში საპოლიციო ძალების მიერ წიწაკის სპრეის მიზანმიმართული გამოყენებისა და წყლის ჭავლისა და ქიმიური გამღიზიანებლების კომბინაციის შესახებ ცნობებს განსაკუთრებით შემაშფოთებელს უწოდებს.
"საქართველოდან ვიღებ შემაშფოთებელ ცნობებს პოლიციის ძალადობის შესახებ მასობრივი საპროტესტო აქციების მონაწილეების მიმართ, რომლებიც ევროკავშირის მოლაპარაკებების გადადებას აპროტესტებენ. მოვუწოდებ მთავრობას პატივი სცეს მშვიდობიანი შეკრების თავისუფლების უფლებას და შეწყვიტოს ნაკლებად სასიკვდილო იარაღის ბოროტად გამოყენება. ვაკვირდებით საქართველოს.
პროტესტის უფლების დაცვის საერთაშორისო სტანდარტები, მათ შორის სტანდარტული პროტოკოლი, მიუთითებს იმაზე, რომ სახელმწიფოები და სამართალდამცავი ორგანოები: 1) ვალდებულნი არიან არ დააწესონ ზედმეტი შეზღუდვები და არ ჩაერიონ მშვიდობიანი შეკრებებში, 2) აქვთ დადებითი ვალდებულება ხელი შეუწყონ მშვიდობიანი შეკრებებს, მათ შორის საპროტესტო აქციებს, იმის უზრუნველყოფით, რომ მონაწილეებს შეეძლებათ უსაფრთხოდ წარმართონ თავიანთი საქმიანობა დისკრიმინაციისა და შეურაცხყოფის გარეშე.
განსაკუთრებით შემაშფოთებელია მიღებული ინფორმაცია, მომიტინგეების სახეებში წიწაკის სპრეის მიზანმიმართული გამოყენებისა და წყლის ჭავლისა და ქიმიური გამღიზიანებლების კომბინაციის შესახებ. მშვიდობიანი შეკრების შესახებ დოკუმენტის 37-ე შენიშვნაში ძალიან მკაფიოდ არის ნათქვამი, რომ "ფართო მოქმედების ნაკლებად მომაკვდინებელ იარაღს, როგორიცაა ცრემლსადენი გაზი და წყლის ჭავლი, როგორც წესი, აქვს განურჩეველი ეფექტი. როდესაც ასეთი იარაღი გამოიყენება, ყველა გონივრული ძალისხმევა უნდა იქნას გამოყენებული რისკების შესამცირებლად (. ..) და ასეთი იარაღი უნდა იქნას გამოყენებული მხოლოდ როგორც უკიდურესი ზომა, სიტყვიერი გაფრთხილების და შეკრების მონაწილეებისთვის დაშლის ადეკვატური შესაძლებლობის მიცემის შემდეგ.
გარდა ამისა, გაეროს მითითება სამართალდამცავ ორგანოების მიერ ნაკლებად ლეტალური იარაღის გამოყენების შესახებ მიუთითებს, რომ წყლის ჭავლი და ცრემლსადენი გაზი შეიძლება გამოყენებულ იქნას სამიზნე ჯგუფებზე და არა ინდივიდებზე. გამაღიზიანებელი ჭურვები (ცრემლსადენი გაზი) ზოგადად არ უნდა იქნას გამოყენებული ინდივიდზე. ნებისმიერ შემთხვევაში, ჭურვები არ უნდა ესროლონ თავში ან სახეზე, დარტყმის ტრავმის შედეგად სიკვდილის ან სერიოზული დაზიანების რისკის გამო.
ასევე, მითითებაში ნათქვამია, რომ წყლის ჭავლმა შეიძლება გამოიწვიოს ჰიპოთერმია და ცივი წყლის შოკი ცივ ამინდში (განსაკუთრებით თუ წყალი არ არის გამთბარი). აუცილებლობისა და პროპორციულობის მოთხოვნების დასაკმაყოფილებლად, წყლის ჭავლის გამოყენება უნდა იყოს საგულდაგულოდ დაგეგმილი და უნდა იმართებოდეს მკაცრი ბრძანებითა და მაღალი დონის კონტროლით." - წერს ჯინა რომერო X-ზე.
