"საქართველო კრიტიკულ გზაჯვარედინზე იმყოფება. მისი დემოკრატიული მომავალი საფრთხის ქვეშ დგას" | ევროპარლამენტის მრავალპარტიული დელეგაცია

13 დეკემბერს, ევროპარლამენტის მრავალპარტიულმა დელეგაციამ ერთობლივი განცხადება გაავრცელა, რომელიც საქართველოს დემოკრატიული მომავლის მხარდასაჭერად და ქვეყანაში არსებული პოლიტიკური კრიზისის გასაუმჯობესებლად მიმართულ ნაბიჯებს მოიცავს.

განცხადება, რომელიც ადრესატებიც არიან ევროკომისიის მაღალი თანამდებობის პირები, მათ შორის კაია კალასი და მარტა კოსი, შეიცავს საქართველოს დემოკრატიის მხარდასაჭერად კონკრეტულ რეკომენდაციებს. 

ხელმომწერები:

•    სერგეი ლაგოდინსკი (მწვანეები/EFA), ევრონესტის საპარლამენტო ასამბლეის დელეგაციის თავმჯდომარე;
•   რასა იუკნევიჩიენე (EPP), საქართველოს საკითხებზე ევროპარლამენტის მუდმივი მომხსენებელი;
•   ნატალი ლუაზო (Renew), სამხრეთ კავკასიასთან ურთიერთობის დელეგაციის პირველი ვიცე-თავმჯდომარე;
•   მიხალ შჩერბა (EPP), სამხრეთ კავკასიის დელეგაციის მეორე ვიცე-თავმჯდომარე;
•   ტობიას კრემერი (S&D), საქართველოს საკითხებზე ჩრდილოვანი მომხსენებელი;
•   რეინიე ვან ლანშოტი (მწვანეები/EFA), საქართველოს საკითხებზე ჩრდილოვანი მომხსენებელი;
•   ბერნარ გეტა (Renew), ევრონესტის საპარლამენტო ასამბლეის წევრი.

დელეგაცია 12 დეკემბერს თბილისში იმყოფებოდა, სადაც შეხვდნენ პრეზიდენტ სალომე ზურაბიშვილს, ოპოზიციის წარმომადგენლებს, სახალხო დამცველს, სამოქალაქო საზოგადოებასა და დამოუკიდებელ მედიას.

"საქართველო კრიტიკულ გზაჯვარედინზე იმყოფება. მისი დემოკრატიული მომავალი საფრთხის ქვეშ დგას. საქართველოს მთავრობის მხრიდან ევროატლანტიკური ინტეგრაციისკენ კონსტიტუციური ვალდებულება დაირღვა, ხოლო "ქართული ოცნების" მმართველობამ გააუქმა ქართველების ევროპული მისწრაფებები", - ნათქვამია განცხადებაში.

ევროპარლამენტარები მოუწოდებენ ევროკავშირს:

1.     დაუყოვნებლივ შემოიღოს სანქციები იმ პოლიტიკური ფიგურების მიმართ, რომლებიც დემოკრატიული უკუსვლის, არჩევნების დარღვევებისა და მშვიდობიანი პროტესტის სასტიკი დარბევების ორგანიზებაში მონაწილეობდნენ;
2.     ახალი ეკონომიკური სანქციების შემოღება განიხილოს აშშ-ის ადმინისტრაციასთან ერთად;
3.     მხარდაჭერა აღმოუჩინოს დამოუკიდებელ მედიას და განიხილოს ევროკავშირის სპეციალური ელჩის დანიშვნა საქართველოს ევროპული მომავლისთვის;
4.     დაუყოვნებლივ გათავისუფლდნენ ყველა პოლიტპატიმარი და შეწყდეს დამოუკიდებელი მედიისა და ოპოზიციის ლიდერების შევიწროება.

განცხადებაში ხაზგასმულია, რომ საქართველოს პოლიტიკური კრიზისის გადაჭრის გზად მიიჩნევა ახალი არჩევნები წლის განმავლობაში, გაუმჯობესებულ საარჩევნო გარემოში, დამოუკიდებელი და მიუკერძოებელი ადმინისტრაციისა და საერთაშორისო მეთვალყურეობის ქვეშ.

"ევროპარლამენტი მტკიცედ დგას ქართველი ხალხისა და მათი ევროატლანტიკური მისწრაფებების გვერდით". - აცხადებენ ევროპარლამენტარები.