9 იანვარს, სალომე ზურაბიშვილი ჯო უილსონთან ერთად "ჰადსონის ინსტიტუტში" საქართველოს შესახებ დაგეგმილ ღონისძიებაში მიიღებს მონაწილეობას
გამოქვეყნდა:
ხუთშაბათს, 9 იანვარს, პრეზიდენტი, სალომე ზურაბიშვილი "ჰადსონის ინსტიტუტში" საქართველოს შესახებ დაგეგმილ ღონისძიებაში მიიღებს მონაწილეობას.
პანელში ასევე მონაწილეობას, აშშ-ის ჰელსინკის კომისიის თავმჯდომარე, რესპუბლიკელი კონგრესმენი ჯო უილსონი, "ჰადსონის ინსტიტუტის" პრეზიდენტი ჯონ უოლტერსი, "მაკკეინის ინსტიტუტის" გლობალური პროგრამების ხელმძღვანელი ლორა თორნტონი, აშშ-ის ყოფილი ელჩი NATO-ში კურტ ვოლკერი და "ჰადსონის ინსტიტუტის" უფროსი მკვლევარი ლუკ კოფი მიიღებენ.
ღონისძიება თბილისის დროით 19:00 საათზე დაიწყება.
"მასობრივი დემონსტრაციები მთელ საქართველოში ოქტომბრის ბოლოს გამართული საპარლამენტო არჩევნების შემდეგ მიმდინარეობს, რომელსაც დამკვირვებლები ფართოდ მიიჩნევენ გაყალბებულად. კრიზისი ნოემბერში გამწვავდა, როდესაც პრემიერმინისტრმა ირაკლი კობახიძემ განაცხადა, რომ საქართველო ევროკავშირში გაწევრიანების მოლაპარაკებებს მინიმუმ 2028 წლამდე შეაჩერებდა.
ბოლო წლებში კობახიძის პარტია "ქართულმა ოცნებამ" კრემლის მომხრე პოზიცია დაიჭირა, დაგმო დასავლეთის სანქციები მოსკოვის წინააღმდეგ, გააღრმავა საქართველოს ეკონომიკური კავშირები რუსეთთან და უკრაინის ომი ჩრდილოატლანტიკურ ორგანიზაციას დააბრალა. პარტიამ შეინარჩუნა ძალაუფლება პოლიტიკური ოპოზიციის, სამოქალაქო საზოგადოებისა და დამოუკიდებელი მედიის ჩახშობის გზით. ამ გამოწვევების მიუხედავად, ქართველები გაბედულად დგანან რუსეთის გავლენის წინააღმდეგ, რომელიც პირდაპირ შეესაბამება შეერთებული შტატების ეროვნულ ინტერესებს", - წერია "ჰადსონის ინსტიტუტის" განცხადებაში.
