სომხეთის მთავრობამ ევროკავშირში გაწევრიანების პროცესის დაწყების შესახებ კანონპროექტი დაამტკიცა

სომხეთის რესპუბლიკის მთავრობამ 9 იანვარს გამართულ სხდომაზე "სომხეთის რესპუბლიკის ევროკავშირში გაწევრიანების პროცესის დაწყების შესახებ" კანონპროექტი დაამტკიცა. ამის შესახებ სომხური მედია წერს.

მთავრობას კანონპროექტი საგარეო საქმეთა მინისტრმა არარატ მირზოიანმა წარუდგინა. კანონპროექტის დამტკიცებამდე მირზოიანმა იმ გარემოებებზე ისაუბრა, რომელმაც მისი თქმით, ხელი უნდა შეუწყოს საკითხის დადებითად გადაწყვეტას.

"ბოლო წლებში სომხეთსა და ევროკავშირს საკმაოდ ინტენსიური და დინამიკური ურთიერთობები აქვთ. მათ ჰქონდათ ძალიან მდიდარი შინაარსი და ასევე მოიცავდნენ სხვადასხვა სფეროს.

ევროკავშირმა არაერთხელ გამოხატა ძლიერი პოლიტიკური მხარდაჭერა სომხეთში დემოკრატიისადმი. ვგულისხმობ ევროკავშირის სამოქალაქო სადამკვირვებლო მისიის განლაგებას. ევროკავშირმა ასევე გამოხატა მზადყოფნა, დაეხმაროს სომხეთის ეკონომიკური მდგრადობის გაძლიერებას. აშკარაა, რომ ევროკავშირს აქვს ძალიან მდიდარი დემოკრატიული ტრადიციები, ძლიერი დემოკრატიული ინსტიტუტები, თავისუფალი კონკურენტული გარემო, თანამედროვე ეკონომიკა და განვითარებული მეცნიერება.

თქვენ, ბატონო პრემიერ-მინისტრო, ევროპარლამენტშიც განაცხადეთ, რომ სომხეთი მზადაა იყოს ევროკავშირთან რაც შეიძლება ახლოს. ჩვენ ასევე ვნახეთ ნიშნები, რომ ეს შესაძლებელია. ვგულისხმობ ვიზალიბერალიზაციის პროცესის დაწყებას და მთელ რიგ სხვა ინსტრუმენტებს, რომლებიც გამოიყენება ან განიხილება ევროკავშირთან. ამ ყველაფრიდან გამომდინარე, ვთავაზობთ დადებითი პასუხის გაცემას. რა თქმა უნდა, გვაქვს წინადადებებიც, რომლებიც ძირითადად ეხება იურიდიულ ტექნოლოგიას“, - განაცხადა საგარეო საქმეთა მინისტრმა.