კოლუმბია აშშ-დან დეპორტირებული მიგრანტების შეუზღუდავად მიღებას დათანხმდა მას შემდეგ, რაც ტრამპი მთავრობას ვიზების გაუქმებითა და ტარიფების ზრდით დაემუქრა
გამოქვეყნდა:
კოლუმბიის მთავრობა დათანხმდა შეერთებული შტატებიდან მიგრანტების შეუზღუდავად მიღებას მას შემდეგ, რაც პრეზიდენტი დონალდ ტრამპი ქვეყნის მთავრობის წევრებს ვიზების გაუქმებითა და იმპორტზე ტარიფების ზრდით დაემუქრა.
აშშ-ის სახელმწიფო მდივნის, მარკო რუბიოს თქმით, თავდაპირველად კოლუმბიამ დეპორტირებული მიგრანტების მიღებაზე თანხმობა განაცხადა, თუმცა, შემდეგ უარი თქვა, მიეღო ორი სამხედრო თვითმფრინავი, რომლითაც კოლუმბიაში მიგრანტებს აბრუნებდნენ.
კოლუმბიის პრეზიდენტმა, გუსტავო პეტრომ განმარტა, რომ ის წინააღმდეგი იყო, მისი მოქალაქეების ისე დაბრუნების, თითქოს ისინი პატიმრები იყვნენ.
თვითმფრინავების არმიღების შემდეგ ტრამპმა კოლუმბიელი მაღალჩინოსნებისთვის ვიზების გაუქმებისა და კოლუმბიიდან შეტანილ საქონელზე ტარიფების 25%-ით ზრდის ბრძანება გასცა. ტრამპმა დაწერა, რომ თუ კოლუმბია "თავის კრიმინალებს" უკან არ მიიღებს, ეს ზომები მხოლოდ დასაწყისი იქნება.
ამის შემდეგ კოლუმბია დათანხმდა სამხედრო თვითმფრინავებით მიგრანტების შეუზღუდავად მიღებას. უკან დახევის შემდეგ ტრამპმა ტარიფების ზრდის ბრძანება გაიხმო, თუმცა, ვიზების გაუქმება ძალაში დატოვა, "სანამ დეპორტაციის პირველი ეტაპი წარმატებით დასრულდება".
