რუსებმა კურსკის ოლქის ქალაქ სუჯაში, სკოლა-პანსიონატს დაარტყეს, რომელშიც მოხუცები, შშმ პირები, ქალები და ბავშვები ცხოვრობდნენ
გამოქვეყნდა:
რუსულმა ძალებმა კურსკის ოლქში, ქალაქ სუჯაში არსებულ სკოლა-პანსიონატს დაარტყეს. კურსკის რეგიონში, უკრაინის შეიარაღებული ძალების დროებითი კომენდანტის სამსახურის ინფორმაციით, შენობას უმეტესად თავს აფარებდნენ მოხუცები და შშმ პირები. მათივე ცნობით, ნანგრევების ქვეშ 95 ადამიანია მოყოლილი. მიმდინარეობს სამძებრო-სამაშველო ოპერაცია.
უკრაინის შეიარაღებული ძალების გენერალური შტაბის განცხადებით, თავდასხმის დროს შენობაში ათეულობით ადამიანი იმყოფებოდა, რომლებიც ევაკუაციისთვის ემზადებოდნენ-" რუსულ მხარეს ჰქონდა ინფორმაცია, რომ სკოლა-ინტერნატში მხოლოდ მშვიდობიანი მოსახლეობა ცხოვრობდა - ადგილობრივი მოსახლეობა, მათ შორის ქალები და ბავშვები. ახლა ყველაფერი კეთდება მათ გადასარჩენად", - იტყობინება გენერალური შტაბის ტელეგრამ არხი.
განცხადებაში არ არის ნათქვამი, რამდენი ადამიანია დაშავებული და არის თუ არა დაღუპული. უკრაინის გენშტაბის ცნობით, დარტყმა განხორციელდა მართვადი საჰაერო ბომბით.
