დღეს კორონავირუსით გარდაცვლილ პაციენტთაგან მეორე 66 წლის კაცია ქობულეთიდან
გამოქვეყნდა:
დღეს, 3 ოქტომბერს საქართველოში კორონავირუსით გარდაცვლილი 2 პაციენტიდან მეორეც აჭარიდანაა. ჯანდაცვის სამინისტროს ინფორმაციით, 66 წლის კაცი ქობულეთის სამედიცინო ცენტრში 2 ოქტომბერს შეიყვანეს.
მისი დიაგნოზი კორონავირუსის გარდა ორმხრივი პნევმონია, სუნთქვის უკმარისობა, მწვავე რესპირაციული დისტრეს სინდრომი და ფილტვის შეშუპება იყო.
პაციენტის მდგომარეობა კლინიკაში შეყვანისთანავე შეფასდა რთულად. პაციენტს ანამნეზში აღენიშნებოდა: გულ-სისხლძარღვთა დაავადებები, შაქრიანი დიაბეტი.კლინიკაში გატარდა ყველა შესაბამისი ღონისძიება, თუმცა თანმდევი დაავადებების სირთულიდან გამომდინარე, სამწუხაროდ, პაციენტის გადარჩენა ვერ მოხერხდა, - ამბობს უწყება.
გარდაიცვალა 2 პაციენტი და გარდაცვლილთა საერთო რაოდენობა 48 გახდა.
ბოლო მონაცემებით საქართველოში:
- კორონავირუსით ინფიცირებულია - 7 564;
- გამოჯანმრთელებულია - 3 992;
- მათ შორის გარდაცვლილია - 48;
- კარანტინის რეჟიმში რჩება - 5 392;
- კოვიდ სასტუმროში მყოფი პირები - 1 100;
- სტაციონარში მეთვალყურეობის ქვეშ - 836, მათ შორის საქართველოში სამკურნალოდ გადმოყვანილია - 41 პაციენტი.
შეგახსენებთ, რომ კორონავირუსის პირველი დადასტურებული შემთხვევა საქართველოში 26 თებერვალს გამოვლინდა.
