"საქართველოში მიღებული კანონი უცხოელი აგენტების შესახებ, შეშფოთებას იწვევს სამოქალაქო საზოგადოებაზე უარყოფითი გავლენის გამო" | ეუთო/ოდირი

ეუთო/ოდირის განცხადებით, საქართველოში მიღებული კანონი უცხოელი აგენტების შესახებ, შეშფოთებას იწვევს სამოქალაქო საზოგადოებაზე უარყოფითი გავლენის გამო.

ODIHR-ის დირექტორის, მარია ტელალიანის თქმით, კანონი ნეგატიურად აისახება სამოქალაქო საზოგადოების მუშაობაზე.

"სამოქალაქო საზოგადოება სასიცოცხლოდ მნიშვნელოვანია ყველა დემოკრატიისთვის და ნებისმიერმა ახალმა მოთხოვნამ უნდა გააძლიეროს მათი მნიშვნელოვანი მუშაობა საერთაშორისო სტანდარტების შესაბამისად, ვიდრე შეზღუდვები დაუწესოს მათ", - ამბობს ის.

განცხადების თანახმად, ახალმა კანონმა, შესაძლოა, შეკრებისა და გამოხატვის თავისუფლების უფლება შეზღუდოს.

"კანონმა, სხვა ბოლოდროინდელ საკანონმდებლო ინიციატივებთან ერთად, შეიძლება კიდევ უფრო შეზღუდოს სამოქალაქო საზოგადოების ორგანიზაციებისა და უფლებადამცველების საქმიანობა, მათი საქმიანობის განსახორციელებლად საჭირო გარანტიების მოხსნით", - წერია განცხადებაში.

განცხადებაში აღნიშნულია, რომ ამერიკულ FARA-ს, რომელზეც საქართველოს ახალი კანონია მოდელირებული, აქვს სამართლებრივი გარანტიები, რომლებიც ხელს უშლის სამოქალაქო საზოგადოების ეტიკეტირებას.

"ის ცდილობს უზრუნველყოს, რომ კერძო კომპანიები ან არაკომერციული ორგანიზაციები, რომლებიც მონაწილეობენ ადვოკატირებაში ან ლობირებაში უცხოური ძალების სახელით, დარეგისტრირდნენ და ეს ინფორმაცია საჯაროდ იყოს ხელმისაწვდომი", - ნათქვამია განცხადებაში.

მათი თქმით, "ერთი ქვეყნიდან მეორეში კანონმდებლობის იმპორტს ყოველთვის სიფრთხილით უნდა მივუდგეთ და განხილვა უფრო ფართო ეროვნული, ინსტიტუციური და სამართლებრივი ჩარჩოს კონტექსტში უნდა მოხდეს.

ODIHR მოუწოდებს "ქართულ ოცნებას", გადახედოს ამ საკანონმდებლო ინიციატივის განხორციელებას და კიდევ ერთხელ ადასტურებს კანონის ფრთხილად გადაფასების აუცილებლობას.

"ოფისი მზადაა, დაეხმაროს საქართველოს საკანონმდებლო ბაზის გაუმჯობესებაში, ამ სფეროში სამართლებრივი მიმოხილვისა და კონსულტაციის სხვა ფორმების მეშვეობით, რომელიც ეფუძნება მრავალწლიან გამოცდილებას", - წერია განცხადებაში.

მათივე თქმით, ეუთოს ყველა მონაწილე სახელმწიფომ აიღო ვალდებულება, დაიცვას შეკრების, გაერთიანებისა და გამოხატვის თავისუფლების უფლებები, როგორც კანონში, ასევე პრაქტიკაში.

"მათ ასევე აღიარეს სამოქალაქო საზოგადოების მნიშვნელობა ადამიანის უფლებების, დემოკრატიისა და კანონის უზენაესობის ხელშეწყობისთვის", - ნათქვამია განცხადებაში.