"მზად ვართ რეაგირებისთვის, ვასრულებთ საპასუხო ზომების პირველ პაკეტს ფოლადზე ტარიფების საპასუხოდ" | ევროკომისიის პრეზიდენტი ტრაპის ტარიფებზე

ევროკომისიის პრეზიდენტი ურსულა ფონ დერ ლაიენი აშშ-ის პრეზიდენტის, დონალდ ტრამპის მიერ ქვეყნებისთვის იმპორტზე ტარიფების დაწესებას ეხმაურება და იმაზე საუბრობს, თუ რა გავლენას მოახდენს ეს ტარიფები მომხმარებლებზე და ბიზნესებზე.

"ამას დაუყოვნებლივ იგრძნობს [მომხმარებელი], რაც დააზარალებს განსაკუთრებით ყველაზე დაუცველ მოქალაქეებს", - თქვა მან და დასძინა, რომ "ყველა ბიზნესი, დიდი და პატარა, პირველივე დღიდან დაზარალდება".

ევროკომისიის პრეზიდენტი ასევე წუხს ტარიფების ფართო ხასიათზე, რაც მკვეთრად იმოქმედებს სავაჭრო ურთიერთობებზე.

"ჩვენ ყოველთვის მზად ვიყავით მოლაპარაკებებისთვის შეერთებულ შტატებთან, რათა მოეხსნათ ნებისმიერი ბარიერი ტრანსატლანტიკური ვაჭრობისთვის. ამავე დროს, ჩვენ მზად ვართ რეაგირებისთვის. ჩვენ უკვე ვასრულებთ საპასუხო ზომების პირველ პაკეტს ფოლადზე ტარიფების საპასუხოდ. ახლა ვემზადებით შემდგომი კონტრზომებისთვის, რათა დავიცვათ ჩვენი ინტერესები და ჩვენი ბიზნესი, თუ მოლაპარაკებები ჩაიშლება... ჩვენ, როგორც ევროპელები, ყოველთვის გავაძლიერებთ და დავიცავთ ჩვენს ინტერესებსა და ღირებულებებს. და ჩვენ მუდამ მხარს დავუჭერთ ევროპას. მაგრამ არსებობს ალტერნატიული გზა. არ არის დაგვიანებული მოლაპარაკებების დაწყებაც", - აღნიშნა ურსულა ფონ დერ ლაიენმა.

ამავე თემაზე: 

დონალდ ტრამპმა აშშ-ში იმპორტირებულ თითქმის ყველა საქონელზე ახალი ტარიფები გამოაცხადა