აშშ-ის პრეზიდენტმა, დონალდ ტრამპმა პლატფორმა TikTok-ზე აკრძალვის აღსრულება კიდევ 75 დღით გადაავადა.
კერძოდ, ამ გადაწყვეტილებით, ტრამპმა ჩინურ ტექნოლოგიურ კომპანია ByteDance-ს 75 დღით გაუხანგრძლივა ვადა, რათა მათ აქტივების გაყიდვა არაჩინურ კომპანიაზე შეძლონ - სხვა შემთხვევაში პლატფორმა აშშ-ში აიკრძალება.
"გარიგება მოითხოვს მეტ შრომას, რათა უზრუნველყოს ყველა საჭირო თანხმობის ხელმოწერა. ჩვენ ვიმედოვნებთ, რომ გავაგრძელებთ კეთილსინდისიერად მუშაობას ჩინეთთან, რომელიც მესმის, რომ არ არის ძალიან ბედნიერი ჩვენი საპასუხო ტარიფებით", - თქვა ტრამპმა.
შეგახსენებთ, რომ აშშ-ის ყოფილმა პრეზიდენტმა, ჯო ბაიდენმა TikTok-ის აკრძალვის გადაწყვეტილება მიიღო და შესაბამის კანონსაც მოაწერა ხელი, რომელიც ძალაში მიმდინარე წლის 19 იანვარს შევიდა. კანონს კონგრესში ორპარტიული მხარდაჭერა ჰქონდა და მის ფარგლებში, TikTok-ი ამერიკის ბაზარს არ დატოვებდა იმ შემთხვევაში, თუ პლატფორმას ვინმე ამერიკელი ან მოკავშირე ქვეყანა შეიძენდა.
უკვე 19 იანვარს, აშშ-ში TikTok-ი მომხმარებლებისთვის ხელმისაწვდომი აღარ იყო, რადგან ბაიდენის მიერ ხელმოწერილი კანონი ძალაში შევიდა. აპი ასევე წაიშალა Apple-ისა და Google-ის აპლიკაციების მაღაზიებიდან აშშ-ში, რის გამოც მისი ჩამოტვირთვა მიუწვდომელი გახდა.
სულ სოციალური ქსელი აშშ-ში 14 საათის განმავლობაში იყო გათიშული. უკვე ინაუგურაციის შემდეგ, დონალდ ტრამპმა ხელი მოაწერა აღმასრულებელ ბრძანებას, რომელიც პლატფორმა TikTok-ზე აკრძალვის აღსრულებას 75 დღით ახანგრძლივებდა.
