კრივი რიჰში ჩადენილი სამხედრო დანაშაულის ფონზე, რუსეთი უკრაინას ენერგეტიკულ ობიექტებზე ცეცხლის შეწყვეტის შეთანხმების "დარღვევაში" ადანაშაულებს | გენშტაბის პასუხი
გამოქვეყნდა:
რუსეთის თავდაცვის სამინისტრო კიდევ ერთხელ ავრცელებს ცრუ განცხადებებს უკრაინის მიერ ენერგეტიკულ ობიექტებთან დაკავშირებით ცეცხლის შეწყვეტის შეთანხმების სავარაუდო „დარღვევის“ შესახებ - აცხადებს უკრაინის გენერალური შტაბი.
უწყების განცხადებით, მტერი ამას საკუთარი დანაშაულებისგან ყურადღების გადატანის მიზნით აკეთებს.
"რუსული მხარის ახალი დეზინფორმაციული ბრალდებები 4 აპრილის დღის განმავლობაში უკრაინის თავდაცვის ძალების მიერ რუსეთის ენერგეტიკულ ინფრასტრუქტურაზე 14 „შეტევის“ შესახებ გავრცელდა. „თავდასხმები“ ყალბია.
ტერორისტული სახელმწიფოს სამხედრო დეპარტამენტი კიდევ ერთხელ მიმართავს ცრუ ბრალდებებს, ცდილობს ომის გახანგრძლივებასა და ადამიანის სიცოცხლეზე საკუთარი პასუხისმგებლობა გადაიტანოს უკრაინაზე.
ჩვენ ველით, რომ მსოფლიო არ მიიღებს რუსულ სიცრუეს და დაგმობს რუსეთის სასტიკ სამხედრო დანაშაულებს.
უკრაინის თავდაცვის ძალები აგრძელებენ ჩვენი ქვეყნისა და ხალხის დაცვას. მადლობა ყველას, ვინც მხარს გვიჭერს და გვეხმარება! " - აცხადებს უკრაინა.
რეალურად კი, 4 აპრილს რუსმა ტერორისტებმა ომის მორიგი დანაშაული თავად ჩაიდინეს და კრივი რიჰს ბალისტიკური რაკეტებით დაარტყეს, რასაც ამ დროისათვის არსებული მონაცემებით, 18 ადამიანი ემსხვერპლა, მათგან 9 ბავშვია. დაშავებულია 60-ზე მეტი, მათ შორის, 12 ბავშვი.
გარდა ამისა, უკრაინის გენშტაბის ცნობით, გასულ დღეს რუსეთის არმიამ უკრაინას 92 „შაჰედის“ ტიპის დრონით შეუტია, ჩამოაგდო 171 მართვადი საჰაერო ბომბი და 6353-ჯერ გამოიყენა არტილერია.
დარტყმების შედეგად დაზიანდა სამოქალაქო და კრიტიკული ინფრასტრუქტურის ობიექტები სუმის, ხარკოვის, დნეპროპეტროვსკის, პოლტავას, კიევის, ზაპორიჟჟიას, ხერსონის, ჩერნიგოვის, ჟიტომირის და უკრაინის სხვა რეგიონებში.
