საბერძნეთში, ჯაშუშობისთვის დაკავებულ ქართველ ემიგრანტზე დამატებითი დეტალები ხდება ცნობილი
გამოქვეყნდა:
საბერძნეთში ჯაშუშობისთვის დაკავებულ ქართველ ემიგრანტზე დამატებითი დეტალები ხდება ცნობილი. ბერძნული მედიის თანახმად, მამაკაცი, რომლის ვინაობა არ სახელდება, საქართველოში 1966 წელს დაიბადა, გაიარა სამხედრო სამსახური და შემდეგ მუდმივად საცხოვრებლად საბერძნეთში გადავიდა. ის მღებავად მუშაობდა და ნასამართლევი არ იყო.
ის პოლიციისა და საბერძნეთის ეროვნული დაზვერვის სამსახურის ერთობლივი ოპერაციის შედეგად დააკავეს. ხელისუფლებამ მის მობილურ ტელეფონში აღმოაჩინა მტკიცებულება, რომ ის ალექსანდროპოლში სამხედრო ობიექტებს მინიმუმ ექვსი თვის განმავლობაში აკვირდებოდა. მას ბრალი ედება ფოტოებისა და ვიდეოების გაგზავნაში თავისი კურატორისთვის, რომელიც რუსეთის ფედერაციასთან არის დაკავშირებული.
59 წლის კაცი სახელმწიფო საიდუმლოების დარღვევის (სისხლის სამართლის კოდექსის 146-ე მუხლი) და ჯაშუშობის (სისხლის სამართლის კოდექსის 148-ე მუხლი) ბრალდებით არის დაკავებული.
საზოგადოებრივი მაუწყებლის, ERT-ის ცნობით, ეჭვმიტანილი აცხადებს, რომ მას არ ჰქონია საბერძნეთის ინტერესებისთვის ზიანის მიყენების განზრახვა და რომ სამხედრო ტექნიკის ტრანსპორტირების ამსახველი ფოტოები და ვიდეოები მედიაში უკვე ისედაც იყო გამოქვეყნებული.
ბერძნული გამოცემა „ევროსი“ იუწყება, რომ მან ფოტოები და ვიდეოები დაშიფრული აპლიკაციის საშუალებით რუსული სპეცსამსახურების სახელით გადასცა თავის კურატორს, თესალონიკიდან ჩამოსულ ბერძენს, ასევე ქართული წარმოშობის. გამოცემა აცხადებს, რომ სავარაუდო მენეჯერი ლიეტუვაში რუსი დისიდენტის მკვლელობის მცდელობისთვის დააკავეს, ციხეში გადაიყვანეს და მის მობილურ ტელეფონში ალექსანდროპულიდან 59 წლის თანამზრახველის ქმედებების გრაფიკული მტკიცებულებები აღმოაჩინეს.
გამოცემის ცნობით, სავარაუდო კურატორი საერთაშორისო კრიმინალური ორგანიზაციის წევრია და რუსეთის სამხედრო დაზვერვამ გადაიბირა.
ლიეტუვის სახელმწიფო უსაფრთხოების დეპარტამენტმა კომენტარის გაკეთებაზე უარი თქვა.
იხილეთ:
