დონალდ ტრამპმა 8 მაისი მეორე მსოფლიო ომში გამარჯვების დღედ ოფიციალურად გამოაცხადა

"ნაცისტური რეჟიმის წინააღმდეგ ბრძოლას სიცოცხლე 250 000-ზე მეტმა ამერიკელმა შესწირა. დღეს და ყოველდღე, ჩვენ პატივს მივაგებთ ყველას, ვინც უდიდესი მსხვერპლი გაიღო თავისი ერისთვის, თავისუფლებისთვის და დასავლური ცივილიზაციის გადარჩენისთვის. ჩვენი ამერიკელი ჯარისკაცების მსხვერპლის გარეშე, ამ ომის მოგება ვერ მოხდებოდა და ჩვენი დღევანდელი სამყარო რადიკალურად განსხვავებული იქნებოდა.

1945 წლის 8 მაისი აღნიშნავს მოკავშირეების მიერ გერმანიის უპირობო კაპიტულაციის მიღებას - წლების განმავლობაში ხანგრძლივი, საშინელი და სასტიკი ომის დასასრულის დასაწყისს. მილიონობით უაზროდ დაკარგული სული გვახსენებს, თუ რატომ უნდა მივაღწიოთ მშვიდობას ძალით.

მე მტკიცედ ვრჩები წლების განმავლობაში მიმდინარე გაუთავებელი უცხოური ომების შეჩერებისა და სიცოცხლის შემდგომი დანაკარგების თავიდან აცილების ერთგული . როგორც ჩემი საინაუგურაციო მიმართვის დროს განვაცხადე, ჩვენ ჩვენს წარმატებას გავზომავთ არა მხოლოდ მოგებული ბრძოლებით, არამედ დამთავრებული ომებითაც - და ჩემი ყველაზე საამაყო მემკვიდრეობა მშვიდობისმყოფელის მემკვიდრეობა იქნება.

მეორე მსოფლიო ომის გამარჯვების დღის აღნიშვნისას, ჩვენ ვუცხადებთ უსაზღვრო მადლობას ყველა პატრიოტს დიდებული თაობიდან, რომლებმაც დატოვეს თავიანთი სახლი და ოჯახი, რათა შორეულ ქვეყნებში ებრძოლათ ჩვენი თავისუფლებისთვის. ჩვენ პატივს ვცემთ ყველა დაღუპულის ხსოვნას. უპირველეს ყოვლისა, ჩვენ ვადასტურებთ ჩვენს ვალდებულებას, შევინარჩუნოთ ამერიკა და მთელი მსოფლიო უსაფრთხო, დაცული, აყვავებული და თავისუფალი.

ამიტომ, ახლა, მე, დონალდ ჯ. ტრამპი, ამერიკის შეერთებული შტატების პრეზიდენტი, კონსტიტუციითა და შეერთებული შტატების კანონმდებლობით მინიჭებული უფლებამოსილების ძალით,  ვაცხადებ 2025 წლის 8 მაისს მეორე მსოფლიო ომში გამარჯვების აღნიშვნის დღედ."

ამის შესახებ ნათქვამია თეთრი სახლის მიერ გამოქვეყნებულ განცხადებაში.