"ვაცხადებ ახალ სავიზო შეზღუდვებს, იმ უცხო ქვეყნის ოფიციალურ პირებსა და იმ ადამიანებზე, რომლებიც ამერიკელების დაცენზურების თანამონაწილეები არიან" | მარკო რუბიო
გამოქვეყნდა:
ამერიკის შეერთებული შტატების სახელმწიფო მდივანმა ახალი სანქციების შესახებ გამოაცხადა. მისი თქმით სავიზო შეზღუდვა შეეხება იმ პირებს, რომლებიც ამერიკელების სიტყვის თავისუფლების უფლების გამოყენებას უზღუდავენ, თუმცა მარკო რუბიოს კონკრეტული ქვეყნები არ დაუსახელებია.
"ძალიან დიდი ხნის განმავლობაში, უცხოური ხელისუფლება ამერიკელებს აჯარიმებდა, ავიწროებდა და ბრალდებებსაც კი უყენებდა სიტყვის თავისუფლების უფლების გამოყენების გამო.
დღეს მე ვაცხადებ ვიზების შეზღუდვის ახალ პოლიტიკას, რომელიც გავრცელდება უცხოელ თანამდებობის პირებსა და იმ პირებზე, რომლებიც ამერიკელების დაცენზურებაში მონაწილეობენ.
სიტყვის თავისუფლება აუცილებელია ამერიკული ცხოვრების წესისთვის - ეს არის თანდაყოლილი უფლება, რომელზეც უფლებამოსილება უცხოურ მთავრობებს არ აქვთ.
უცხოელები, რომლებიც ამერიკელების უფლებების შელახვაზე მუშაობენ, არ უნდა სარგებლობდნენ ჩვენს ქვეყანაში მოგზაურობის პრივილეგიით. ლათინურ ამერიკაში, ევროპაში თუ სხვაგან, დასრულდა პასიური მოპყრობის დღეები იმ ადამიანების მიმართ, ვინც ამერიკელების უფლებების შელახვაზე მუშაობს." - განაცხადა აშშ-ის სახელმწიფო მდივანმა მარკო რუბიომ.
სახელმწიფო დეპარტამენტის პრესრელიზში აღნიშნულია, რომ ეს ვიზების შეზღუდვის პოლიტიკა შეესაბამება იმიგრაციისა და მოქალაქეობის შესახებ კანონს, რომელიც სახელმწიფო მდივანს აძლევს უფლებამოსილებას, არ დაუშვას ნებისმიერი უცხოელის შემოსვლა, რომლის შეერთებულ შტატებში შესვლასაც „ შესაძლოა შეერთებული შტატებისთვის სერიოზული უარყოფითი საგარეო პოლიტიკური შედეგები მოჰყვეს“. ეს შეზღუდვები შეიძლება მოიცავდეს სანქცირებული პირების ოჯახის გარკვეულ წევრებსაც.
