„ქართულ ოცნებას“ სექტემბერში 6 მილიონზე მეტი შესწირეს - ვინ არიან გულუხვი ბიზნესმენები?

„ქართულ ოცნებას“ მხოლოდ სექტემბერში 6 მილიონ 495 650 ლარი შესწირეს. ინფორმაციას შემოწირულობებზე სახელმწიფო აუდიტის სამსახური ავრცელებს.

აუდიტის ინფორმაციით, მმართველ გუნდს ფული 245-მა სუბიექტმა შესწირა.

გამოიკვეთა, რომ ხელისუფლებას ფულს ძირითადად ის ბიზნესმენები სწირავენ, რომლებიც ან პირდაპირ არიან დაკავშირებული "ქართულ ოცნებასთან", ან ბიუჯეტიდან სოლიდურ თანხებს იღებენ სახელმწიფო შესყიდვების გზით.

ჩემს ფულს სად დავხარჯავ, ვისი რა საკითხავია - ამბობს ბიძინა სუნღულაშვილი, გურჯაანში "ქართული ოცნების" მაჟორიტარი დეპუტატობის კანდიდატის, დავით სონღულაშვილის მამა,  რომელმაც სექტემბერში "ოცნებას" 60 000 ლარი შესწირა. 

არასამთავრობო ორგანიზაციების წარმომადგენლები და ოპოზიცია ანტიკორუფციულ სამსახურს მოუწოდებენ, დაინტერესდეს მსგავსი ტიპის შემოწირულობებით. 

ეს არის შემდეგი სქემა: კონკრეტული კომპანიები იგებენ ტენდერებს და შემდეგ უკვე სწირავენ "ქართულ ოცნებას". ეს არის დალაგებული სქემა, შესყიდვების სისტემის გამოყენებით, კონკრეტული თანხები მიედინება კონკრეტულ კომპანიებში და შემდეგ ეს კომპანიები და მათთან დაკავშირებული პირების წირავენ "ქართულ ოცნებას". მნიშვნელოვანია, რომ სამართალდამცავი უწყებებიც დაინტერესდნენ კონკრეტული ტენდერებით- ამბობს "საერთაშორისო გამჭვირვალობა - საქართველოს" აღმასრულებელი დირექტორი, ეკა გიგაური. 

• ოპოზიციური პარტიებიდან ყველაზე მეტი შემოწირულება „ლელო“ მიიღო. სექტემბერში მას 1 მილიონ 312 590,51 ლარი შესწირეს.
• ოპოზიციურ პარტიებს შორის მეორე ადგილზეა „გიორგი ვაშაძე-სტრატეგია აღმაშენებელი“ - მიიღო 1 მილიონ 172 837 ლარის შემოწირულობა
• მესამე ადგილი - „ენმ". პარტიას სექტემბერში 665 400 ლარი შესწირეს.
• „ევროპული საქართველოს“ - 408 031,3 ლარი.