თელავის ცენტრალური საავადმყოფოს დირექტორი რაიონული პოლიციის უფროსის მოადგილემ მოკლა - POG
გამოქვეყნდა:
საქართველოს პროკურატურის განცხადებით, კახეთში მომხდარი მკვლელობის ფაქტზე შსს კახეთის პოლიციის დეპარტამენტის თელავის რაიონული სამმართველოს უფროსის მოადგილე, ვ.ზ. დააკავეს. შეგახსენებთ, რომ შემთხვევა გვიან ღამით მოხდა, გარდაცვლილი კი თელავის ცენტრალური საავადმყოფოს დირექტორი, ზურა საჩიშვილია.
"პროკურატურამ, კახეთში მომხდარი მკვლელობის ფაქტზე, შსს კახეთის პოლიციის დეპარტამენტის თელავის რაიონული სამმართველოს უფროსის მოადგილე, ვ.ზ. შემთხვევის ადგილზე ბრალდებულის სახით დააკავა. სისხლის სამართლის საქმეზე გამოძიება კახეთის საოლქო პროკურატურის საგამოძიებო სამმართველოში, სისხლის სამართლის კოდექსის 108-ე მუხლით მიმდინარეობს", - წერია უწყების განცხადებაში.
მიმდინარე გამოძიებით დგინდება, რომ 2020 წლის 26 დეკემბერს, თელავის რაიონის სოფელ იყალთოში, ვ.ზ.-მ ურთიერთშელაპარაკების ნიადაგზე, შურისძიების მოტივით, ცეცხლსასროლი იარაღის გამოყენებით, განზრახ მოკლა ზ.ს. შემთხვევის ადგილზე ასევე ურთიერთშელაპარაკებისას ხელის არეში დაიჭრა ლ.ბ.
საქმეზე ტარდება ყველა საგამოძიებო და საპროცესო მოქმედება.
