გააშავოს ენმ და გააფუჭოს ურთიერთობა მეზობელთან - ციხიდან გამოგზავნილ წერილში ივერი მელაშვილი "ოცნების" ორ მიზანს შიფრავს

დავითგარეჯის საქმეზე დაკავებული კარტოგრაფის ივერი მელაშვილის წერილი, სადაც ის მისი დაკავებისა და ზოგადად, მისი საქმის დეტალების შესახებ საუბრობს, ასევე ახსენებს ოპოზიციურად განწყობილ ტელევიზიებს და მის მხარდამჭერებს, "მთავარი არხის" ეთერში, გადაცემაში "მთავარი დებატები" თამარ ბაღაშვილმა გაასაჯაროვა.

"უპირველეს ყოვლისა, ჩემი მხარდაჭერისთვის, უდიდეს მადლობას მოვახსნებ ჩემს კოლეგებს საგარეო საქმეთა სამინიტროდან, არასამთავრობო ორგანიზაციებს, ოპოზიციურად განწყობილ ტელევიზიებს და მასმედიის სხვა საშუალებებს, ოპოზიციურ პარტიებს და საღად მოაზროვნე საზოგადოებას, ნათესავების, ნაცნობების, თუ უცნობი კეთილმოსურნეების ჩათვლით. საპყრობილეში არსებული ინფორმაციის შეზღუდულობის პირობებშიც კი ვგრძნობ იმ მხარდაჭერას, რაც მამხნევებს და მეხმარება უსამართლობის განცდის გადატანაში,- აღნიშნავს პოლიტიუკური ნიშნით დაკავებული კარტოგრაფი.

ამავე წერილში ივერი მელაშვილი მასსა და ნატალია ილიჩოვას წინააღმდეგ დაწყებულ გამოძიებას და სასამართლო პროცესებსაც ეხება და აღნიშნავს, რომ ეს პროცესები მიმართულია მძიმე ბრალდების შესათითხნად და "ორი ექსპერტის ციხეში გამოსაკეტად".

"ჩემი და ნატალია ილიჩოვას საქმისადმი, გენ.პროკურატურის, სასამართლო სისტემის და სამთავრობო სტრუქტურების დამოკიდებულება, ნათლად წარმაოჩენს, რომ მათთვის არ არის მთავარი სიმართლის დადგენა, მთელი ეს გახმაურებული პოორცესი მიმართულია გაყალბებული, უბინძურესი ბრალდების შეთითხვნის და ორი უდანაშაულო ექსპერტის ციხეში გამოსაკეტად, რაც შეიძლება მეტი ხნით. წინააღმდეგ შემთხვევაში, ძალზე მარტივად გაკეთდებოდა, ბრალდების მთავარი არგუმენტის 1936-37 წლების გამოცემის 1-200 ათასინი მასშტაბის მქონე რუკების ანალიზი.

შესაბამისად, საფუძველი გამოეცლებოდა რამდენიმე ინტრიგანის პროვოკაციულ მოსაზრებებს, თიტქოსდა დაკარგული ფართობების შესახებ. სამწუხაროდ, მარტივი ანალიზის შედეგად, რეალურად, ამ საქმეში იკვეთება ივანიშვილის მთავრობის ორი ფარული, პოლიტიკური მიზანი!

პირველი: გახმაურებული საქმის წამოწევის გზით, როგორმე გააშავოს ნაციონალური მოძარობა, თითქოსდა წინა ხელისუფლების მიერ, აზერბაიჯანის რესპუბლიკისთვის რაღაც ტერიტორიების გადაცემის „ფაქტთან“ დაკავშირებით.

და მეორე: გააფუჭოს, გაამწვავოს საქართველოს ურთიერთობა მის პარტნიორ ქვეყანასთან, - ნათქვამია წერილში.

ივერი მელაშვილი იმედს გამოთქვამს, რომ ქართული საზოგადოება წინ აღუდგება ქვეყნის ინტერესების წინააღმდეგ მიმართულ პროვოკაციულ ქმედებებს.

იმედი მაქვს, ქართული საზოგადეობა წინ აღუდგება ქვეყნის ინეტერესების საწინააღმდეგოდ მიმართულ ამ პროვოკაციულ ქმედებას. აქვე, მინდა მოვუწოდო სამთავრობო სტრუქტურებში, მართლმსაჯულებასა და სასამართლო სისტემაში მომუშავე იმ მოხელეებს, რომელთაც შემხებლობა აქვთ ამ საქმესთან; ნუ დააყენებთ თქვენს პირად ღირსებასა და პროფესიონალიზმზე მაღლა, შიშსა და გამორჩენაზე დაფუძნებულ მერკანტილურ ინტერესებს!

ნუ გაისვრით ხელს!!  შეეწინააღმდეგეთ უსამართლობას და ქვეყნის საზიანოდ მიმართულ ქმედებას,  - წერს ივერი მელაშვილი 2020 წლის დეკემბრით დათარიღებულ, ციხიდან გამოგზავნილ წერილში. 

შეგახსენებთ, რომ აზერბაიჯანთან საზღვრის დადგენის კომისიის წევრები ივერი მელაშვილი და ნატალია ილიჩოვა 7 ოქტომბერს დააკავეს. სასამართლომ მათ 8 ოქტომბერს, წინასწარი პატიმრობა შეუფარდა.

პროკურატურა ექსპერტებს სადემარკაციო კომისიაში მუშაობისას, საქართველოს ტერიტორიული ინტერესების საწინააღმდეგო რუკებით მუშაობაში ადანაშაულებს.

საგამოძიებო უწყების მტკიცებით, "ექსპერტიზის დასკვნით დადგინდა, რომ ბრალდებულები საზღვრების დელიმიტაციის პროცესში ხელმძღვანელობდნენ 1970-80-იან წლებში გამოცემული რუკებზე დატანილი საზღვრის ხაზებით, რაც, როგორც აღინიშნა, არსებითად ეწინააღმდეგება ჩვენი ქვეყნის ისტორიულ საზღვარს, მათ შორის, დავითგარეჯთან მიმართებაში."

დაკავებულების წინააღმდეგ გამოძიება საქართველოს სისხლის სამართლის კოდექსის 308-ე მუხლის პირველი ნაწილით მიმდინარეობს, რაც 10-დან 15 წლამდე პატიმრობას ითვალისწინებს.