ბაჩალიაშვილის საქმეში მტკიცებულების შესაძლო ფალსიფიკაციაზე გამოძიება მიმდინარეობს - POG
გამოქვეყნდა:
საქართველოს პროკურატურის განცხადებით, 23 წლის პროგრამისტის, თამარ ბაჩალიაშვილის გარდაცვალების ფაქტთან დაკავშირებით, მტკიცებულების შესაძლო ფალსიფიკაციის ფაქტზე გამოძიება მიმდინარეობს. ამ თემაზე უწყებამ განცხადება ცოტა ხნის წინ გაავრცელა.
"გამოძიების დაწყებას საფუძვლად დაედო მოქალაქე გ.თ.-ს მიერ მოწოდებული ინფორმაცია, რომლის მიხედვითაც მასთან მცხოვრებ ნათესავ გოგონას მ.შ.-ს, რომელიც ფსიქიკური პრობლემებიდან გამომდინარე მეურვეობას საჭიროებს და მასთან ცხოვრობს, სისტემატიური სატელეფონო ურთიერთობა აქვს თამარ ბაჩალიაშვილის დედასთან თეონა თამაზაშვილთან და მის ადვოკატ მიხეილ რამიშვილთან, რომლებსაც მცდარ ინფორმაციას აწვდის იმის შესახებ, რომ თითქოს იგი თამარ ბაჩალიაშვილს იცნობდა და მისი გარდაცვალების გარემოებებთან დაკავშირებით გარკვეულ ინფორმაციას ფლობს. გ.თ.-ს ჩვენებით აღნიშნული არ შეესაბამება რეალობას და მ.შ.-ს წარმოსახვისა და ფანტაზიის ნაყოფი უნდა იყოს. აღნიშნული ასევე დაადასტურა მოწმის სახით გამოკითხულმა მ.შ.-ს ბიძამ ს.ჯ.-მ", - წერია განცხადებაში.
სისხლის სამართლის საქმეზე გამოძიება საქართველოს სისხლის სამართლის კოდექსის 369 პრიმა მუხლის პირველი ნაწილით გრძელდება. გამოძიების ფარგლებში ტარდება ყველა საჭირო საგამოძიებო და საპროცესო მოქმედებები.
შეგახსენებთ, რომ ადვოკატმა მიხეილ რამიშვილმა დღეს თქვა, რომ საქმეში ახალი ფიგურანტი და მტკიცებულებები გამოჩნდა. მისი განცხადებით, როგორც ჩანს სამართალდამცავი სტრუქტურები ფაქტით დაინტერესდნენ, მოიძიეს პირი, საქმის ერთ ერთი მოწმე, მივიდნენ მასთან სალხში დააშანტაჟს და დაემუქრნენ.
შეგახსენებთ, რომ თამარ ბაჩალიაშვილი 18 ივლისს გაუჩინარდა. ახალგაზრდა პროგრამისტი შაბათს სახლიდან გავიდა და სათვალთვალო კამერებმა ბოლოს თეთრიწყაროს რაიონში დააფიქსირეს. 23 წლის თამარ ბაჩალიაშვილი თეთრიწყაროს ტყეში, საკუთარ მანქანაში გარდაცვლილი იპოვეს.
გამოძიების ვერსიით, ბაჩალიაშვილის სიკვდილი დიდი რაოდენობით მედიკამენტების მიღებამ გამოიწვია.
17 დეკემბერს გენერალურმა პროკურატურამ თამარ ბაჩალიაშვილის საქმეზე მიმდინარე გამოძიება დაასრულა და გამოძიება შეწყვიტა.
