საქართველოში COVID 19-ით დაინფიცირებულთა და გამოჯანმრთელებულთა რაოდენობა გაიზარდა

საქართველოში ახალი კორონავირუსის 227 შემთხვევაა დადასტურებული. მათ შორის გამოჯანმრთელებულია 52 პაციენტი. 

თბილისის ინფექციური საავადმყოფოს სამედიცინო დირექტორი, მარინა ეზუგბაია აცხადებს, დაინფიცირებულებიდან ერთი არასრულწლოვანია. ამ ეტაპზე 35 პაციენტი ინფექციურ სავადმყოფოშია და 2-ის მდგომარება კრიტიკულია.

რაც შეეხება მძიმე პაციენტებს, 7 მძიმე პაციენტზე ვლაპარაკობ ბოლო რამდენიმე დღეა და 2 პაციენტი განსაკუთრებით მძიმეა. 1 პაციენტი განსაკუთრებით მძიმედან სტაბილურია უკვე სამი დღის განმავლობაში და შეგვიძლია ვთქვათ, რომ ის განსაკუთრებით მძიმე აღარ არის, არის მძიმე. კლინიკაში ერთი არასრულწლოვანია, მისი მდგომარეობა დამაკმაყოფილებელია", – აცხადებს მარინა ეზუგბაია.

რაც შეეხება ბოჭორიშვილის სახელობის კლინიკაში არსებულ მდგომარეობას, მათ დღეს 3 ახალი პაციენტი დაემატათ, რომელთაგან ერთი 6 წლის ბავშვია. 

კლინიკის სამეთვალყურეო საბჭოს თავმჯდომარის, მაკა სოლოღაშვილის განცხადებით, სამი ახალი პაციენტიდან ერთი ეროვნული ბანკის თანამშრომლის ოჯახის წევრია. სოლოღაშვილის ინფორმაციით, კლინიკაში შეყვანილი დედა-შვილი თურქეთიდან დაბრუნდა.

სამი პაციენტი დაემატა დღეს დადასტურებული დიაგნოზებიდან. ამ სამიდან ერთი არასრულწლოვანია. დედამ და 6 წლის შვილმა თურქეთის საზღვარი რამდენიმე დღის წინ გადმოკვეთა. მათი ჯანმრთელობის მდგომარეობა დამაკმაყოფილებელია", – აცხადებს მაკა სოლოღაშვილი.

კარანტინის რეჟიმში - 4722 ადამიანი რჩება,  სტაციონარში მეთვალყურეობის ქვეშ კი- 408 იმყოფება.