არ შეიძლება, 9 საათზე ცხვრებივით მიგვერეკებოდნენ სახლში - ზურა ჯაფარიძე
გამოქვეყნდა:
"არ შეიძლება ცხრა საათზე ასე ცხვრებივით მიგვერეკებოდნენ სახლში", - ამის შესახებ "გირჩი - მეტი თავისუფლების" ლიდერი ზურაბ გირჩი ჯაფარიძე "მთავარი არხის" გადაცემაში "მთავარი დებატები" საუბრობს.
ის ამომრჩეველს 3 აპრილს, კომენდანტის საათისა და კორონარეგულაციების დარღვევის გამო გამოწერილი ჯარიმების გაუქმების მოთხოვნით გამართულ აქციაზე მისვლისკენ მოუწოდებს.
ჯაფარიძის თქმით, კორონავირუსის გამო დაწესებული ყველა შეზღუდვა მოსახსნელია.
ბევრ ლოკაციაზე იკრიბებიან ადამიანები. კონკრეტულად "გირჩი - მეტი თავისუფლება" იკრიბება 17:00 საათზე, ვაკის პარკთან. გვექნება მსვლელობა, იქიდან დავიძვრებით და შევუერთდებით სხვა ლოკაციებიდან შეკრებილ ხალხს. ეს კორონაშეზღუდვები ყველა მოსახსნელია, ადამიანებმა ეს უნდა გაიაზრონ, არ შეიძლება ცხრა საათზე ასე ცხვრებივით მიგვერეკებოდნენ სახლში. მანამ სანამ ამას არ დავძლევთ და არ გადავლახავთ, რთულია სხვა უფრო დიადი მიზნებისთვის ბრძოლა, - ამბობს ჯაფარიძე.
ცნობისთვის, 3 აპრილს აქცია-მსვლელობა "დაასრულე კომენდანტი" გაიმართება.
