შინაგან საქმეთა სამინისტროს ინფორმაციით, ჩხოროწყუში 25 წლის კაცის მკვლელობის ბრალდებით, 1992 წელს დაბადებული რ.კ. დააკავეს.
უწყების ცნობით, ბრალდებულმა, ჩხოროწყუს მუნიციპალიტეტის ერთ-ერთ სოფელში, ურთიერთშელაპარაკების ნიადაგზე, 1993 წელს დაბადებულ პირსა და მის ძმას ცივი იარაღით დაზიანებები მიაყენა.
დაჭრილი პირები საავადმყოფოში გადაიყვანეს, სადაც ერთ-ერთი მიყენებული ჭრილობის შედეგად გარდაიცვალა.
გამოძიება განზრახ მკვლელობის ფაქტზე სსკ-ის 108-ე მუხლით მიმდინარეობს. დანაშაული 7-დან 15 წლამდე ვადით თავისუფლების აღკვეთას ითვალისწინებს.
ცნობისთვის, ჩხოროწყუში გუშინ გვიან ღამით 25 წლის ამირან მორგოშია მოკლეს. დაჭრილია მორგოშიას ძმა, მურთაზ მორგოშია. არსებული ინფორმაციით, შემთხვევა ხანძკის ცენტრში, ღამის 2 საათზე მოხდა. ინციდენტს წინ სიტყვიერი შელაპარაკება და გარჩევა უძღოდა.
არსებული ინფორმაციით, მკვლელობაში ბრალდებულმა ამირან მორგოშია და მისი 2 ძმა სოფლის ცენტრში დაიბარა და 15 პირთან ერთად დანით შეიარაღებული დახვდა. ამირან მორგოშიას ჭრილობები მუცლისა და ზურგის არეში დანით აქვს მიყენებული. 25 წლის კაცი ადგილზე გარდაიცვალა.
