დედაქალაქის მერი და თბილისში "ქართული ოცნების" მერობის კანდიდატი, კახა კალაძე ამბობს, რომ სახელმწიფო უსაფრთხოების სამსახურმა უნდა მოუსმინოს ყველას, ვინც მოსასმენია.
სუს-იდან გამოჟონილ ფაილებს კალაძე ჟურნალისტებთან საუბრისას გამოეხმაურა და თქვა, რომ უწყებამ ქვეყანაში უსაფრთხოება უნდა დაიცვას და მოსმენები კანონის ფარგლებში უნდა ხორციელდებოდეს. ხოლო კითხვაზე, უნდა უსმენდეს თუ არა სუს-ი დიპლომატებს კალაძემ თქვა, რომ "თუ ასეა საჭირო, მაშინ კი".
"უშიშროების სამსახური არის იმისთვის, რომ ქვეყანაში დაიცვას უსაფრთხოება, მოუსმინოს იმას, ვისაც მოსასმენია, კანონის ფარგლებში. ყველა ქვეყანაში ეს ასე ხდება, ჩემო მეგობრებო.
შესაბამისად, ჩვენი სამსახური უნდა იყოს ყოველთვის მოწოდების სიმაღლეზე, აუცილებლად უნდა მოუსმინო, ვისაც სჭირდებათ და მოსასმენია, რა თქმა უდნა, კანონის ფარგლებში",-თქვა კახა კალაძემ.
ცნობისთვის, 13 სექტემბერს ინტერნეტსივრცეში ფარული მიყურადების შესახებ მორიგი ინფორმაცია გავრცელდა.
"მთავარი არხის" ეთერში, ნიკა გვარამიას "მთავარ აქცენტებში" კი სუს-ის მოქმედმა თანამშრომელმა ქვეყანაში ტოტალური მოსმენები დაადასტურა.
