ეკლესიამ უნდა მოუწოდოს მრევლს, არჩევნებზე მხარი დაუჭირონ მას, ვინც რუსეთს არ დაგვამონებს - დეკანოზი

დეკანოზი თამაზ ლომიძე ამბობს, რომ ეკლესია არჩევნებში უნდა ჩაერიოს. როგორც ის Facebook-ზე წერს, სასულიერო პირებმა მრევლს გარკვევით უნდა უთხრან, ვის დაუჭირონ მხარი არჩევნებზე.

"ეკლესიამ უნდა მოუწოდოს მრევლს, რომ არჩევნებზე მხარი დაუჭირონ მხოლოდ მას, ვინც უსასრულოდ არ იტყუება, ვინც ასრულებს დანაპირებს, ვინც არ “გადააგდებს” პარტნიორებს, ვინც საქართველოს ხალხის მიერ არჩეულ კურსს ცივილიზირებული სამყაროსკენ არ გადაუხვევს და ისევ რუსეთს არ დაგვამონებს, ვინც რეალურად ყოველდღე იბრძვის ოკუპაციის წინააღმდეგ, ვინც ოკუპანტთან მონურად არ თანამშრომლობს, ვინც მოღალატეებს და უცოდინრებს არ დააწინაურებს, ვინც სირთულეებზე, შეცდომებზე და ხალხის გაჭირვებაზე ღიად ისაუბრებს, იშრომებს და გადაჭრის მათ პრობლემებს და არა უსასრულო ტყუილებით და თავის მოსულელებით დაიმალება მათგან და ბოლოს, ვისაც ესმის რას ნიშნავს გქონდეს საკუთარი დამოუკიდებელი ქვეყანა, ვინც პატივისცემით მოეპყრობა და ღირსებას აღუდგენს ქართულ სახელმწიფოს და მის ინსტიტუტებს. ეს ნამდვილად უნდა უთხრას ეკლესიამ მრევლს არჩევნების წინ. შემდეგ ყველამ საკუთარი ჭკუა-გონებით შეაფასოს და აირჩიოს", - წერს დეკანოზი თამაზ ლომიძე. 

ცნობისთვის, საპატრიარქოს პრესსპიკერმა, დეკანოზმა ანდრია ჯაღმაიძემ სუს-დან გამოჟონილ ფაილებთან დაკავშირებით საპატრიარქოს ტელევიზიის ეთერში ისაუბრა. მან ტელევიზიები გააკრიტიკა და დაუსაბუთებელი ინფორმაციების გავრცელებაში დაადანაშაულა. ამასთან, დააანონსა, რომ მრევლს ეკლესია მითითებებს მისცემს, რა უნდა გააკეთოს არჩევნებზე.