ჩვენთვის არავითარი მნიშვნელობა არ აქვს, რომელი ევროპარლამენტარი რას იტყვის - ღარიბაშვილი
გამოქვეყნდა:
პრემიერმინისტრი ირაკლი ღარიბაშვილი ამბობს, რომ მმართველი პარტიისთვის არავითარი მნიშვნელობა არ აქვს, რომელი ევროპარლამენტარი რას იტყვის. ამ განცხადებით ღარიბაშვილი დასავლელი პარტნიორების ღია წერილს გამოეხმაურა, რომელშიც ისინი მიხეილ სააკაშვილის გათავისუფლებას ითხოვენ.
ღარიბაშვილი ამბობს, რომ "კანონის და სამართლის აღსრულებას წინ ვერავინ აღუდგება".
"მე მინდა ჩვენს მოსახლეობას ავუხსნა, რომ მუდმივი სპეკულირება მიმდინარეობს იმის თაობაზე, რომ ვიღაც ევროპარლამენტარი გამოდის ბრძნული სახით და გვაძლევს ბრძნულ რჩევებს. სია არ მინახავს, მაგრამ რაც მომიყვნენ, სხვათა შორის ბევრი, ქართული გვარებიც აღმოვაჩინეთ, როდის გახდნენ ქართველები ევროპარლამენტარები, არ ვიცი.
მე მინდა ერთი რამე გითხრათ, რომ ჩვენს ქვეყანაში კანონის აღსრულებას და სამართლის აღსრულებას ვერავინ აღუდგება წინ, რამდენი ევროპარლამენტარიც არ უნდა გამოვიდეს, ჩვენ სრულად გამჭვირვალე პროცესი გვაქვს, ჩვენთან უზრუნველყოფილია კანონის უზენაესობა, შესაბამისად, ეს ყველასთვის უნდა იყოს ცხადი. არავითარი მნიშვნელობა არ აქვს ჩვენთვის, რომელი ევროპარლამენტარი რას იტყვის, ჩვენთვის მთავარია ხალხი რას იტყვის", - თქვა ირაკლი ღარიბაშვილმა.
ცნობისთვის, გავლენიანმა ევროპარლამენტარებმა, ყოფილმა პრეზიდენტებმა, ცნობილმა პოლიტიკურმა და საზოგადო მოღვაწეებმა მიხეილ სააკაშვილის მხარდასაჭერად ერთობლივი განცხადება გაავრცელეს, რომელსაც 70 ხელმომწერი ჰყავს. დასავლელი პარტნიორები წერილში მიხეილ სააკაშვილის გათავისუფლებას ითხოვენ.
