"როგორც მოსალოდნელი იყო, არ შეგვხვდა, ამის გამბედაობა არ აქვს" - ხატია დეკანოიძე იუსტიციის მინისტრზე

საქართველოს იუსტიციის მინისტრი რატი ბრეგაძე, ოპოზიციური პარტიების ლიდერებს არ შეხვდა.

როგორც "ნაციონალური მოძრაობის" წევრმა ხატია დეკანოიძემ აღნიშნა, მინისტრს გამბედაობა მასთან პირისპირ შეხვედრისთვისაც არ ეყო.

მისივე თქმით, ახლა მთავარი ორი ადამიანის - მიხეილ სააკაშვილისა და ელენე ხოშტარიას სიცოცხლის გადარჩენაა.

"იუსტიციის მინისტრი, როგორც მოსალოდნელი იყო, არ შეგვხვდა. არ შემხვდა მე ცალკე. პირდაპირ ვთქვი, რომ მას გამბედაობა არ აქვს. მას აქვს ერთადერთი გამბედაობა- დაჯდეს "იმედის" ეთერში და ისაუბროს სახელისუფლებო არხების ეთერში. ასევე დაჯდეს ამ ციხე-სიმაგრეში გარშემორტყმული პოლიციელებით.  სხვათაშორის ეს ადამიანი ძალიან თავისუფლად, კარგად და კომფორტულად გრძნობდა თავს "ნაციონალური მოძრაობის" მმართველობის პერიოდში. ესეთი პორტირებები ჩვენ ხშირად გვინახავს, მაგრამ ეს არ არის მთავარი. ახლა მთავარია გადავარჩინოთ 2 ადამიანის სიცოცხლე. მიხეილ სააკაშვილის სიცოცხლე და მეორე ელენე ხოშტარია რომელიც ასევე მძიმედ არის იმ კონტექსტში, რომ მხნედ არის, მაგრამ უკვე მე-7 დღეა შიმშილობს და ამ შიმშილობას თავისი გავლენა აქვს", - თქვა ხატია დეკანოიძემ.

ცნობისთვის აქციის მონაწილეებმა იუსტიციის სამინისტროსთან მთავრობის ადმინისტრაციის მიმდებარე ტერიტორიიდან გადაინაცვლეს, სადაც მთელი ღამის განმავლობაში იმყოფებოდნენ. მათი მოთხვნა რიგგარეშე არჩევნები და მიხეილ სააკაშვილის პატიმრობიდან გათავისუფლებაა.