რას გულისხმობთ ტერმინში, პოლიტპატიმარი? - მინისტრი ბრეგაძე ანა ფოტიგას წერილით პასუხობს
გამოქვეყნდა:
იუსტიციის მინისტრი ბრეგაძე, ევროპარლამენტარ ანა ფოტიგას წერილს, რომლითაც ფოტიგამ, გლდანის ციხის სამკურნალო დაწესებულებაში, მიხეილ სააკაშვილის მონახულება მოითხოვა, წერილით პასუხობს.
ბრეგაძე ანა ფოტიგასგან ტერმინ - "პოლიტიკური პატიმრის" განმარტებას ითხოვს და წერს, რომ "ქართული ოცნების“ ხელისუფლებაში ყოფნის პერიოდში ადამიანის უფლებათა ევროპულ სასამართლოს თუ სხვა რომელიმე ავტორიტეტულ ინსტიტუტს ასეთად არ მიუჩნევია არცერთი პატიმარი საქართველოში".
ამასთან, რატი ბრეგაძე ანა ფოტიგასთვის უარს, მიხეილ სააკაშვილის უსაფრთხოების და ჯანმრთელობის დაცვის მოტივით ხსნის.
იუსტიციის მინისტრის წერილს სრულად გთავაზობთ:
„ქალბატონო ანა,
2021 წლის 9 ნოემბრით დათარიღებულ წერილთან დაკავშირებით, რომლითაც თქვენ ითხოვეთ პატიმარ მიხეილ სააკაშვილის მონახულება მე-18 პენიტენციურ სამკურნალო დაწესებულებაში, გაცნობებთ შემდეგს:
მე-12 პენიტენციურ დაწესებულებაში შესახლების დღიდან მიხეილ სააკაშვილი სარგებლობს ყველა უფლებით, რომლითაც საქართველოს კანონმდებლობით უზრუნველყოფილია ყველა მსჯავრდებული/ბრალდებული. მათ შორის, მასთან განხორციელდა 201 ვიზიტი, რაც მეტყველებს საქართველოს ხელისუფლების გამჭვირვალობაზე. მის ჯანმრთელობის მდგომარეობას მუდმივად აკონტროლებს პენიტენციური დაწესებულების სამედიცინო პერსონალი, მისი პირადი ექიმი და მისი სამედიცინო საჭიროებების რეგულარული შეფასების მიზნით შეკრებილი ექიმების ჯგუფი (კონსილიუმი).
მიხეილ სააკაშვილის მიერ მე-12 პენიტენციურ დაწესებულებაში მიწოდებული მკურნალობის მნიშვნელოვანი ნაწილის მიღებაზე უარის გამო, 2021 წლის 8 ნოემბერს იგი გადაიყვანეს მე-18 პენიტენციურ სამკურნალო დაწესებულებაში - მისი ჯანმრთელობისთვის რისკების მინიმიზაციისა და შესაძლო გართულებების პრევენციის მიზნით.
2021 წლის 10 ნოემბერს მიხეილ სააკაშვილმა ადამიანის უფლებათა ევროპულ სასამართლოში საჩივარი შეიტანა, რომლითაც ითხოვდა სასამართლოს მიერ მთავრობისთვის დროებითი ღონისძიების დაკისრებას - მომჩივნის მე-18 პენიტენციური სამკურნალო დაწესებულებიდან სამოქალაქო სექტორის კლინიკაში გადაყვანას. იმავე დღეს სასამართლომ გადაწყვიტა: ა) მომჩივანს დაჟინებით მოუწოდოს შიმშილობის შეწყვეტისკენ; ბ) საქართველოს მთავრობამ უზრუნველყოს მომჩივნის ჯანმრთელობის მდგომარეობის შესახებ ინფორმაციის მიწოდება, პენიტენციურ დაწესებულებაში მისი ზოგადი უსაფრთხოების უზრუნველყოფა და მისთვის შიმშილობის შეწყვეტის შემდგომ პერიოდში სათანადო სამედიცინო მომსახურების მიწოდება. ამდენად, შესაბამისი მასალებისა და მტკიცებულებების განხილვის შემდეგ, სასამართლომ ჩათვალა, რომ მომჩივნის ჯანმრთელობის მდგომარეობა და დაწესებულების სტანდარტები დამაკმაყოფილებელია, რითაც გამოირიცხა სხვა საავადმყოფოში მისი გადაყვანის მოთხოვნის საჭიროება.
სააკაშვილის ჯანმრთელობის მდგომარეობიდან გამომდინარე, რომელიც კვლავ უარს ამბობს სასიცოცხლოდ მნიშვნელოვანი სამედიცინო მომსახურების მიღებაზე, ასევე, მისი ჯანმრთელობისა და უსაფრთხოების უზრუნველყოფასთან დაკავშირებით პენიტენციური სამსახურის ვალდებულების გათვალისწინებით, მასთან დაიშვებიან მხოლოდ საქართველოს პატიმრობის კოდექსით გათვალისწინებული ვიზიტორები.
თქვენს წერილში ახსენებთ წარსულში თქვენს ვიზიტებს „პოლიტიკური პატიმრების“ მოსანახულებლად. მადლობელნი ვიქნებით, თუ განმარტავთ, რას გულისხმობთ ამ ტერმინში, იმ ფაქტის გათვალისწინებით, რომ „ქართული ოცნების“ ხელისუფლებაში ყოფნის პერიოდში ადამიანის უფლებათა ევროპულ სასამართლოს თუ სხვა რომელიმე ავტორიტეტულ ინსტიტუტს ასეთად არ მიუჩნევია არცერთი პატიმარი საქართველოში“,-წერს რატი ბრეგაძე ევროპარლამენტარს.
ანა ფოტიგამ, გლდანის მე-18 დაწესებულებაში შესვლაზე იუსტიციის მინისტრს წერილი 9 ნოემბერს მიწერა. წერილში ნათქვამია, რომ ანა ფოტიგას მიხეილ სააკაშვილის მონახულება, მისი ჯანმრთელობის მდგომარეობის გამო სურდა.
ევროპარლამენტარი წერს: "წლების განმავლობაში ყურადღებით ვადევნებდი თვალყურს საქართველოში მიმდინარე პოლიტიკურ მოვლენებს და არაერთხელ ვყოფილვარ ქვეყანაში სხვადასხვა თანამდებობებით. წარსულში, მე ასევე მოვითხოვე ყოფილი პოლიტპატიმრების მონახულება და ყოველთვის მაძლევდნენ ამის საშუალებას, რაც საქართველოს ხელისუფლების კეთილგანწყობისა და გამჭვირვალობის ნიშანი იყო. იმედი მაქვს, რომ ეს სტანდარტები საქართველოს ყოფილი პრეზიდენტის შემთხვევაშიც იქნება დაცული".
"ოცნების" ხელისუფლებამ ანა ფოტიგას მიხეილ სააკაშვილის მონახულების უფლება არ მისცა.
